Lahore, Nohprah:
Katkum ki khubor la ong ba uwei u khynnah-samla 20 snem na Punjab Province jong ka Pakistan, u la mynsaw hadien ka jingshah dait sing katba u dang pyrshang ban shon dur ‘Selfie’ ialade bad utei u sing hapoh ka jaka ri mrad kaba don ha katei ka ri. Kane ka jingjia ka long tang hadien shi taiew ba 4 tylli ki sing ki la thombor bad pyn mynsaw ia uwei u briew hapoh ka Zoo kaba don ha katei hi ka thaiñ. Katei ka jingjia ha kane ka por, ka la jia ha ka Sngi Ba-ar ha ka Lok Mela (Fair) ba la pynlong da katei ka Park and Horticulture Authority (PHA) hapoh ka nongbah Sargodha, kumba 200 Kilometre ka jing jngai na Lahore.
Ia utei u samla la ithuh kyrteng kum u Muhammad Amin bad u la shah tan bad shah troh ha utei u sing katba u dang leit tur shajan ka ruh ba la set ia u ha katei ka por ba u mut ban leit shon dur. La ong ba u Amin u la mynsaw jur bha ha katei ka jingjia bad ki bor pyniaid katei ka jaka ki la ioh ban pynkit bad phah sumar noh ia u sha ka hospital kaba do ha katei hi ka nongbah, ha kaba ki doktor bad ki nongsumar na katei ka hospital ki la iathuh ba ka jingim jong utei u samla ka dang don hapdeng ki jingma namar ka jingmynsaw ka la jur.
Kumba la dep pynkynmaw, la ong ba kane ka jingjia ka long tang hadien 1 tarik ba 4 tylli ki sing ha ka Safari Zoo kaba don hapoh ka nongbah Bahawalpur, kumba 400 Kilometre na Lahore, kiba la dait bad pyniap ia uwei u briew ha katei ka jaka. Ki nongpeit jong katei ka Zoo ki la shem pat ia ka met jong utei u briew haduh ka por ba ki leit ban ai bam ia kitei ki mrad. Hadien kata, ki pulit ki la pyntip ba utei u briew uba shah dait sing u dei uba la kyrni ha ki jingdih droks bad u la leit ruh shapoh ka ruh jong kitei ki sing khlem ka jingtip jong ki nongpeit jong katei ka jaka.
