Shillong, Nohprah 14
Ka Mawliehpoh SC ka la ïasam mar shi point ha ka jingïakhun pyrshah ïa ka Pompyrthat SC jong ka lympung ïalehkai Second Division Football League ba la pynïaid da ka Tyrsad Area Sports Association (TASA).
Kane ka jingïasam mar shi point ka la wan hadien ba ki la ïakhaid mar 1-1 kol ha ka sngi Palei ha madan Tyrsad. Ka Mawliehpoh ka la ïoh ban pynkhih jar nyng-kong lyngba u Shalis Rani ha ka minit kaba 15, hynrei ka Pompyrthat ka la lah ban pynïakhaid kylla lyngba u Roni Nongrum ha ka minit kaba 43. Lyngba kane ka jingïakhaid ka la pynlong ïa ka Pompyrthat ban shah pynhiar kyrdan noh sha ka Third Division.
Haba phai sha ka jingïakhun jong ka Third Division, ka Mawkynroh SC ka al pynliem noh ïa ka Nongmadan SC lyngba ka shi kol ba la thep da u Respalin Lyngkhoi ha ka minit kaba 45.
Kane ka lympung kan bteng biang ha ka sngi Saitjaiñ ha kaba ka jingïalehkai ha ka Third Division kan long hapdeng ka Mawdngong SC pyrshah ïa ka Nongthymmai Neng SC ha ka por 10:30 mynstep, katba ka Wahnongkseh SC ïa ka Laitniangtlong SC ha ka por 12:30 mynsngi.
Ka jingïakhun semi final jong ka Second Division kan long hapdeng ka Mawrohroh SC pyrshah ia ka Laitmawhing SC ha ka por 2 baje janmiet.
