Amlarem, Nohprah 14
Ka Amlarem Social Club bad ka Shkentalang kin ïaknieh ïa ka nam lahduh ha ka jingïakhun final jong ka lympung ïalehkai Super Division Football League ka ban long ha ka 19 tarik mynta u bnai ha ka por 2 baje nohphai sngi.
Ïa kane ka lympung la pynïaid da ka Amlarem Sub Division Sports Association (ASSA) ha madan Mini Stadium Ladjaplem, Amlarem.
Ha kane ka jingïakhun final, u Myntri ka tnad ïalehkai jong ka Sorkar Jylla, u Bah Shakliar Warjri bad u MLA ka thaiñ u Bah Lahkmen Rymbui kin wan ban sakhi lang.
Haba phai sha ka jingïakhun semi final kaba khatduh kaba la long mynta ka sngi, ka Amlarem Social Club ka la pynliem ïa ka Jarain da 1-0 kol. Ïa kane ka kol la thep da u Kloi Rasmut (38).
Katba ka jingïakhun final jong ka lympung ïalehkai Upper Division bad Lower Division kan long ha ka 15 tarik mynta u bnai ha ka por 12 baje mynsngi.
