Shillong, Nohprah 14
Ka tnat ïalehkai jong ka Sorkar Jylla ka la rai ban pynlut haduh T.23 klur tyngka na ka bynta ka 5th Meghalaya Games ka ban long ha Tura naduh 15 haduh 20 tarik u Kyllalyngkot jong u snem 2024.
Kane ka jingpynlut ka la long haduh phra shah na kaba la pynlut ha ka 4th Meghalaya Games jong u snem 2022 kaba la long ha ka nongbah Shillong kaba long tang T. 2.39 klur tyngka.
Haba ïakren bad ki nongthoh khubor ha ka sngi Palei, u Myntri ka tnat ïalehkai u Bah Shakliar Warjri u la pynpaw ba kane ka jingpynlut kham bun ka pisa ka long namar ba ka Sorkar ka don ïa ka jingthmu ban pynlong ïa ka National Games. “Kane ka jingpynlut haduh T. 23 klur ka kynthup ha kaba shna bad marmot ïa ki jaka ïalehkai, ki jaka sah, ka bam, ka leit ka wan bad kiwei kiwei. Kane ka long ruh shi bynta ban pdiang ïa ka National Games hapoh ka Jylla ha u snem 2024 lane 2025.”
U Bah Shakliar u la ïathuh ruh ba na ka liang ka Sorkar ka la pynlong ïa bun tylli ki jingïalang ban khmih bniah ïa baroh ki jingdonkam na ka bynta katei ka lympung kaba kynthup naduh ki jaka sah jong ki nongïalehkai, ki jaka ïalehkai bad kiwei kiwei.
U la ïathuh ba kin don palat 3000 ngut ki nongïalehkai ki ban wan ïashim bynta bad wat ki jaka ïalehkai ruh ki lah dep ban maramot.
U la ïathuh ruh ba yn pynlong haduh 22 tylli ki jait jingïalehkai, kynthup ïa lai tylli ki jingïalehkai tynrai. “Ka jingthmu ka long ban kyntiew ïa ka kam ïalehkai khamtam ha ka ban plie lad ïa ki samla ba kin sei ïa ka sap ka phong jong ki da ka jingkhmih lynti ba ki nongïalehkai kin lah ban ïalehkai bha ha ki lympung ïalehkai National Level.”
Shuh shuh u Bah Shakliar u la pynthikna ruh ba ki nongïalehkai kin ym mad ïa ki jingeh ha kaba ïadei bad ki jaka sah namar da lade hi u la leit jurip bun sien na ka bynta ban pynbiang ïa baroh ki jingdonkam na ka bynta ki nongïalehkai.
Utei u Myntri u la ong ba ïa ki nongïalehkai ki ban ïashim bynta ha ka Meghalaya Games kin hap ban leh ïa ka Doping Test na ka bynta ban khmih bniah ba ki nongïalehkai kim dei ban pyndonkam ïa kino kino ki jingdih kiba sniew.
Lah ban pynkynmaw ba ha ka 37th National Games kaba dangshu dep shen ha Goa, ka Meghalaya kam shym la lah ban khur wat tang kawei ka takma rnong ruh. Katba kiwei pat ki hynñiew tylli ki jylla ka thaiñ shatei lammihngi ki la lah ban khur takma.
