Washington, Nohprah:
U President ka United States- u Joe Biden ha ka Sngi Balang u la pynbna ia ka jingthmu jong u ban kyndun ia ki bahaiing- hasem jong kito ki nong US kiba la shah rahbor ha ki lehnoh Hamas bad kiba la dang shah pyllait shen ha kine ki khyndiat sngi ba la leit bad kane ka long ruh ha kane ka por ba la Israel ka dang iai bteng ia ka jingleit hiar thma sha Gaza wat haba kiba bun ki tnat bad ki ri jong ka pyrthei ki la kyntu ia ka Israel ba ka dei ban sangeh noh ia ka thma namar ka jingshah ktah jur ki paidbah nongshong shnong ka Palestine kiba don hapoh Gaza Strip.
La ong ba ki don 8 ngut ki nong US kiba la shah rahbor bad kiba la pyllait noh da ka kynhun lehnoh Hamas ha ka taiew ba la lah bad kumta la ngeit ba ki bahaiing- hasem jong kitei ki 8 ngut ki nong America ba kin leit poi sha ka White House ban ïadon bynta ha katei ka jingiakynduh jongki bad u President jong ka ri.
Kumba la tip bad ïohsngew, ki lehnoh Hamas ki la rahbor kumba 240 ngut ki briew na Israel ha ka por ba ka Hamas ka la leit ban hiar thma ia ka Israel ha ka 7 tarik jong u Risaw ba la leit bad kumba 1,200 tam ruh ki la khlad ha Israel ha katei ka por ka jingleit hiar thma jong ka Hamas.
Kumjuh ruh la ong ba ha ka jingsangeh thma ba 7 sngi jong ka Israel ha kane ka taiew ba la lah, ki lehnoh Hamas ki la ioh ban pyllait noh ia 100 ngut kiba ka la rahbor naduh ba sdang jong ka thma, kynthup ia kitei ki 4 ngut ki nong America. Katba kiba sah pat ki dang don ha ka kti ki lehnoh Hamas hi namar ka jingpynkut noh jong ka Israel ia katei ka jing iamynjur ban sangeh thma. Haba iadei bad kane, ka Israel ruh ka la ther bom naphang sha kylleng ki bynta jong ka Gaza ha kaba ki don palat 18,000 ngut ki briew kiba la khlad bad duh noh ia ka jingim ha katei ka jingleit hiar thma bad jingpynhiar kput jong ka Israel ia ki lehnoh Hamas hapoh Gaza.
