Chennai, Nohprah:
Ka sorkar Tamil Nadu kan sa pynbiang ïa ka jingïarap pisa kaba T. 6,000 kumba la pynbna shi bynta ban lah pynbiang ïa ki jingdonkam sha kito kiba don ïa ki Card Ration ha ki saw tylli ki distrik kiba la shah ktah jur na ka jingkhie jong ka ‘erïong Michaung, kiba kynthup ïa ka Chennai, la ong u Myntri ka pla tyngka u Thangam Thennarasu.
Ki slip na ka bynta ban ïoh ban pdiang ïa kine ki jingïarap yn sa sam ha ka 16 tarik, Nohprah sha baroh kito kiba don ïa ki Ration card ha Chennai bad ka jingpyntreikam na ka bynta ban sam ïa ka pisa yn sa pyndep ha ki shiphew sngi, la ïathuh u heh pulit.
Ha ka 9 tarik, Nohprah, u Myntri Rangbah jong ka jylla u M K Stalin u la pynbna ka jingïarap pisa kaba mar T. 6,000 sha man kawei pa kawei ka longïing kaba la shah ktah jur na ka jingshlei um bad ong ba ïa ka pisa yn sa ai ha kti.
Ka Chennai, Chengalpattu, Kancheepuram, bad ka Tiruvallur ki la ngat ha ka jingshlei um namar ka jingkhie jong ka ‘erïong Michaung ha ka 3 tarik, Nohprah bad ka 4 tarik, Nohprah.
Ha ka jingïakren bad ki nongthoh khubor ha Chennai, u Thennarasu u la ong ba ka sorkar jylla ka la phai khmat ban pynbiang ïa ki jingdonkam ha kaba ïadei bad kane ka jinglong jingman.
Ha kaba ïadei bad kane, la ong ba la dep ban pyllait da kumba T. 17.80 klur ka pisa jingïarap sha ki lanot shlei um.
Kane ka kynthup ïa ka jingnohsynñiang da 10,77,000 tylli ki bitor um, 3,02,165 song ki ruti, 13,08,847 song ki biskit, 73.4 tonne ka dud powder, 4,35,000 kilo u khaw, 23,220 kilo ki shana bad kiwei pat ki jingber ha kaba ïadei bad ka kam shet.
Kumjuh ruh la ïathuh ba la pynbiang da kumba 82,400 tylli ki jaiñ siang thiah, ki sopti phong bad kiwei kiwei pat ki jingdonkam kiba man ka sngi ïa kiba la dep ban pynbiang sha ki.
