Rennes, Nohprah:
Kawei ka khynnah skul 12 snem ka rta, ka la byrngem ia la ka jong ka nonghikai da kaba pynap tari ia katei ka nonghikai hapoh skul ha ka Sngi Balang bad kane ka la jia ha ka phang Northern jong ka France. Katei ka jingjia ha kane ka kynti ka la pynpar ñiangkhriat ia ki nongshong shnong jong katei ka thaiñ haba ki ïohsngew ia katei ka khubor ka jingshah byrngem jong ka nonghikai skul ha ka khynnah rit.
Watla katta, la ong ba ym shym don kano kano ka jingjia kaba sngewsih ha katei ka sngi bad ym shym la don ba mynsaw eiei ruh ha kane ka jingjia kaba la jia hapoh ka thaiñ Rennes hynrei ki bor pyniaid ki la pyntip ba kin hap ban tohkit bniah ia katei ka khynnah bad kumjuh ruh ia katei ka nonghikai ban lap ia ka daw jong katei ka jingjia.
Ki bor pyniaid jong katei ka skul ha katei ka sngi ki la iathuh ba katba katei ka nonghikai ka dang ai jinghikai sha ki khynnah ha katei ka sngi, kynsan katei ka khynnah 12 snem ka la shu ïeng beit naba shong bad rah ia ka tari ban byrngem pynmynsaw ia katei ka nonghikai khlem kano- kano ka daw kaba lah ban pynbitar ia katei ka khynnah rit.
Katei ka khynnah la ong ba ka la rah lypa ia katei ka tari kaba heh bad da ka jingthmu ruh ban pyniap syndon ia katei ka nonghikai jong ka sobjek ‘English’.
La ong ba ha katei ka jingjia, katei ka nonghikai tang mar ia iohi ia katei ka khynnah ba ka leit tur sha ka, ka la mareh bad phet krad bad ha kaba khatduh ki nong-ap pahara jong katei ka skul ki la ioh bat bad ioh knieh ia katei ka tari na katei ka khynnah skul.
Namar la ong ruh ba ki la don shibun ki jingjia bad jingkhih win hapoh France bad ha kylleng ki jaka pule jong kane ka ri kaba don ia shibun bah ki paid Muslim bad ki nong Jiw. Kumta la ong ba ha kum kane ka por lei ba jia sa ka thma hapdeng ka Israel bad ki lehnoh Hamas jong ka Palestine hapoh Gaza, ka jinglong- jingman ha kylleng ki jaka pule jong katei ka ri ka la shong syier bad kam don jingshngaiñ khamtam ia ki khynnah pule kiba kham pher jaitbynriew.
Ha u Risaw, uwei u khynnah pule nong Islam u la pyniap ia la u jong u nonghikai hapoh ka jaka pule kaba don ha ka shnong Arras.
