Khliehriat, Nohprah 15
Ka Rymbai Shkenshyn-riah SC ka la long ka lahduh jong lympung ïalehkai Super Division Football League na ka bynta ka 3rd Kyrmen Shylla Contribution Trophy ba pynïaid da ka East Jaiñtia Hills District Football Association (EJHDFA).
Kane ka nam ka la wan hadien ba Rymbai Shkenshynriah ka la pynliem ïa ka Sutnga SSSC lyngba ka shi kol ba la thep da u Obadaia Bareh ha ka minit kaba 73 ha ka jingïakhun phainal kaba la long ha madan Diengshynrum ha ka sngi Thohdieng.
Da kane ka nam jop ka Rymbai Shkenshynriah kan mihkhmat ïa ka district sha ka Meghalaya State League ka ban sa long ha u snem ban wan.
Ka Rymbai Shkenshyn-riah ka la khur ïa ka song pisa kaba T. 1 lak ryngkat ka trophy ba la sam da u Myntri Sorkar Jylla uba dei ruh u MLA ka Khliehriat u Bah Kyrmen Shylla, katba ka kynhun kaba wan ba-ar ka la ïoh T. 50,000 ryngkat ka Trophy ba la sam da u President MFA u Bah Hamletson Dohling ha ka jingdonlang ki nongkitkam bad dkhot ka EJHDFA bad kiwei.
Ka khusnam Best Discipline Team ka la leit sha ka Dhana SC, Best Goal Keeper la ioh da u Shain Muksor (Thangskai Tiger SC), Player of the Tournament la ïoh da u Ioanis Suchen (Sutnga SSCC) bad ka Player of the Match da u Obadaia Bareh (Rymbai Shkenshynriah).
