Shillong, Nohprah 15
Ka Shillong Lajong Football Club kan pynkhreh ïa ka jingïakhun shabar na la ïing ha ka lympung ïalehkai I-League pyrshah ïa ka Real Kashmir ha ka sngi Saitjaiñ ha TRC Turf Ground kaba ha Srinagar.
Kane kan dei ka jingïakhun kaba lai jong ka Lajong shabar na la ïing hadien ba la ïakhaid mar 1-1 kol pyrshah ïa ka Mohammedan SC bad kumjuh ïa ka Rajasthan United.
Wat hapdeng ka jingkhriat ha Kashmir, kane ka kynhun ïalehkai ka nongbah hapoh ka jingïalam u Bah Bobby Lyngdoh Nongbet ka donkam ban khur ïa ka jingjop ha kane ka jingïakhun shabar na la ïing.
Te kumta ka Lajong ka la don ha ka kyrdan ba san bad kamai 16 point na ki khyndai sien ïakhun, katba ka Real Kashmir ka la don ha ka kyrdan balai bad kamai 17 point na ki khyndai sien ïakhun.
Ha kane ka jingïakhun ka Lajong kan duh noh ïa ki katto katne ki rangïalehkai kiba la mynsaw ha ki jingïalehkai ba la dep kum u Phrangki Buam, Damaitphang Lyngdoh, Kenstar Kharshong, Everbrightson Sana Mylliempdah bad u Sangti Janai Shianglong. Namar kata la khmih lynti ba kin lah ban wanphai sha ka jingïakhun pyrshah ïa ka Namdhari FC ka ban long ha ka nongbah Shillong ha ka 23 tarik mynta u bnai.
Hynrei ka Lajong ka don jingkyrmen ba kan ïalehkai bha lyngba ka jingwanphai biang ki rangïalehkai shapdeng na Brazil u Renan Paulino De Souza uba la shah pynduh ïalehkai ha ka jingiakhun ba la lah na ka daw ba u la ïohpdiang ïa ki saw tylli ki yellow card.
Dangshen ha ka jingïalehkai ha ka nongbah Shillong, ka Lajong ka la mad ïa ka jingshah rem kaba nyngkong eh ha kane ka lympung da 3-0 kol ha ka Aizawl FC.
