Shillong, Nohprah 15
Ka lympung ïalehkai 29th State Karate Championship 2023 ba la pynïaid da ka All Meghalaya Karate-Do Association (AMKA) ka la sdang ha ka sngi Thohdieng ha Indoor Stadium kaba ha Jawaharlal Nehru Sports Complex, Polo.
Ïa kane ka lympung ïalehkai kaba ar sngi la kyrshan da ka tnat ïalehkai jong ka Sorkar Jylla ba la wan ïashim bynta haduh 372 ngut ki khynnah kiba naduh kiba hapoh 10 snem bad haduh kiba la heh la san (senior).
Ha kane ka sngi la ïadon lang u Co-Chairman ka Meghalaya Industrial Development u Bah Ransom Sutnga, President ka Mawkhar Sports Club ha ryngkat u Working President ka Meghalaya State Olympic Association Bah John F. Kharshïing kum u synjuk bad kiwei ki riew rangbah.
Haba ai jingkren ha kane ka sngi, u Bah Sutnga u la ong, “Ka AMKA ka la ju pynlong ïa ka lympung ïalehkai manla u snem. Naduh u snem 1981, ka AMKA ka la lah ban pynmih haduh 200 ngut ki nongïalehkai kiba la khur takma hapoh ka ri bad 20 kiba la khur takma ha ki lympung ïakop shabar ri.”
U la bynrap ruh da kaba ong ba ki dangdon shibun kiba kane ka synjuk kan dangpynmih ha ki snem ki ban dangwan.
U Bah Sutnga, uba la pynbna ba la plie ïa kane ka lympung ïalehkai, u la noh synñiang da ka ‘cheque’ sha u President ka AMKA u Bah Hunlang Lytan bad General Secretary Bah Ksan Warjri na ka bynta ban pyntyllun ïa ki kam ki jam jong ka synjuk.
Na ka liang u Bah John u la ai khublei ïa ka AMKA kaba la pynlong ïa kane ka lympung na ka bynta ban plie lad ïa ki khynnah ïalehkai kylleng ka jylla. Shuh shuh u la ai khublei ruh ïa ki kmie ki kpa kiba la pynshlur ïa la ki jong ki khun ha kane ka jingïalehkai. U la ong lyngba ka Meghalaya Sports Policy ki nongïalehkai kin ïoh ïa ki jingmyntoi.
Ha kane ka lympung la pynlong ïa ki jingïalehkai kum ka kumite (sparring) bad ka kata (demonstration of form) na ka bynta ki kynhun bad para marwei ha la ki jong ki kyrdan ïalehkai.
