Hyderabad:
Ka Trisha kaba dei kawei na ki puron jong ki phlim South kan sa wanphai biang sha ki phlim Telegu ha kaba kane ka puron kumba la mih khubor kan sa shim bynta ha kawei na ki phlim ban ak da u Chiranjeevi bad Nagarjuna.
Kane ka puron kaba la ak ruh ha ki phlim Tamil ka la ai ka jingmynjur ban shim bynta ha ki artylli ki phlim Telegu kiba yn lam khmat da u Chiranjeevi bad Nagarjuna.
Ka Trisha kaba la ak haduh 3 tylli ki phlim mynta u snem kiba kynthup ka Ponniyin Selvan 2, The Road bad Leo ka la shah iaroh bha ha kaba iadei bad kitei ki phlim thymmai bad ha kajuh ka por ka la pyni ruh ba ka dei kawei na ki puron ba tbit bad ba kynsai bha.
Hadien bun bun snem ba ka Trisha ka la sangeh ban ak ha ki phlim Telegu ha u snem ban wan kan sa ioh biang ia ka lad ban shim bynta haduh 2 tylli ki phlim Telegu lem bad ki Superstars.
Ha kajuh ka por kane ka puron ha ka sien ba san kan sa iakynduh bad u Ajith ha ka Vidaamuyarchi bad ia ka jingrwai na ka bynta kane ka phlim yn thaw da u Anirudh Ravichander.
Ka Trisha ka la khring ia kiba bun ki direktor ka Tollywood ha kaba iadei bad ka jinglong tbit bad jinglong kynsai jong ka bad lada ki phlim ba ka ak ha u snem ban wan ki long kiba itynnad kan sa nang kham pawnam bad kham paw pyrthei shuh shuh.
Kane ka puron kaba la don bynta bad ka Tollywood la bun bun snem ka sngew ba ki don ki phlim ba ka shim bynta kiba ka la shah iaroh bha bad ki don pat kiba la mad ia ka jingduhnong hynrei kine kim shim don kano kano ka jingktah ia ka.
