Shillong, Nohprah 17
Ka Manipur ka donkam ban tied haduh 270 run na ka bynta ban khur jingjop ha ka lympung U-19 Men’s Cooch Behar Trophy ha ka jingïalehkai pyrshah ïa ka Meghalaya ha ka sngi kaba saw bad kaba dei ruh kaba khatduh. Kane ka thong kan dei ruh kaba eh bad ym kaba suk ban kot.
Haba phai sha ka jingïalehkai ha ka sngi kaba lai kaba la long ha madan MCA ha Polo, ka Manipur ka la lah ban tied sa tang phra run ha kane ka step haba bteng na ka jingkamai run 259/8 ha kaba kut jong ka sngi ba-ar, kata ban hap lut ki wiket hadien ba la kamai 267, kata ban dang duna sa 53 run na ka thong ba la buh da ka Meghalaya ha ka pali ba nyngkong kata 320 run.
Ka Meghalaya haba bteng ban tied ha ka pali kaba ar, ka la shem jingeh ha kaba sdang hynrei watla katta ruh ka la lah ban kamai haduh 46 run khlem hap wiket, lyngba ka jinglah ban tied bad ïalehkai bha jong u Manthan Dey bad u Shubham Rasaily. Hynrei nangne shakhmat hapdeng jong ki 20 tylli ki over ba la kawang da ka Manipur, ka Meghalaya ka la duh noh haduh 6 tylli ki wiket bad la i kumba kan nym lah ban kamai bun run.
Hynrei ka jinglah pat ban ïalehkai jai jai jong u Angkit bad u Kishlay Vishlux, kiba la ïadon lang hapdeng madan jan baroh ka bynta jong ka second session, ki la kamai lang haduh 84 run na ka bynta ka wiket kaba hynñiew.
U Kishlay, uba la tied 52 run ha ka pali kaba nyngkong, la i kumba un bteng ban kamai biang sa kawei ka 50 run, hynrei mar ïa ïoh 49 run, u la shah pynhap noh ka wiket ha u nongkawang bol ba tbit tam ka Manipur, u Joyhenba.
