Mumbai, Nohprah:
Ha Maharashtra, ki la don kumba 96,811 ngut ki nongrep ïa kiba la shah kyntait na ka ban ïohpdiang ïa ki jingai jingïarap hapoh ka skhim ‘Namo Shetkari Mahasanman Nidhi Yojana’. Kane ka la long namar ba ki Bank Accounts bad ki Aadhaar Number jong ki kim shym la ïasohlang, la pynshai u Myntri ka State Agriculture u Dhananjay Munde ha ka por ba ka la don ka dorbar jong ka Legislative Assembly ha Nagpur ha ka sngi Palei jong ka taïew ba la dep, la ïathuh ka tyllong khubor.
Kumba la ïathuh ka tyllong khubor, la ong ba ïa kane ka skhim la pyllait paidbah da ka sorkar jylla na ka bynta ban pynbaing ki jingïarap pisa sha ki nongrep, ban pynkiew ïa ka jingsiew ba la sam na ka Centre’s Pradhan Mantri Kisan Samman Nidhi Yojana.
Kum shi bynta ban ai jubab halor ka jingkylli ba la wan na u MLA jong ka seng AIMIM u Mufti Mohammad Ismail Abdul Khalik, u Munde u la ong ba napdeng ki nongïoh myntoi kiba la dei ban ïoh na ka pisa kaba la ïoh kynshew lyngba ka PM Kisan Samman Nidhi Scheme, ki la don kumba 96,811 ngut ki nongbat ïa ki Bank Account jong ka jylla ki bym shym ïoh jingmyntoi ei ei na ka jingtreikam ka skhim haduh ka 26 tarik, Risaw jong une u snem namar ka jingbym pynïasoh ïa ki Aadhaar Number bad ki Bank Account, la bynrap ka tyllong khubor.
U Munde u la kdew shai da kaba ong ba ka jingpynïasoh ïa ki Bank Account jong ki nongrep bad ki Aadhaar jong ki ka dei kaba dang pyntreikam mynta.
Ki nongïoh myntoi ki la dei ba leit mih markhmat sha ki jaka treikam jong ka sorkar kiba don ha ki thaiñ jong ki ha ka ban pyndep na ka bynta kane ka jingpynïasoh bad ban pyndep ïa ki jingdonkam baroh ha kaba ïadei bad ka jingpynïasoh ïa Bank Accounts bad ki Aadhaar Number jong ki, la ong u Myntri.
Ki nongïoh myntoi kin sa sdang ban ïohpdiang ïa kine ki jingïarap, u Munde u la pyntikna da kaba ong ba ki jingai jingïarap kin sa bteng hadien ba la dep ban pynïasoh kumba dei rukom.
Nalor kane, u Anil Bhaidas Patil, u Myntri uba dei ban khmih ïa ka Relief and Rehabilitation, u la ïathuh hapoh Maharashtra Assembly ha ka sngi Palei bad ki la don kumba 2,366 ngut ki nongrep kiba la ïap ha ka jylla hapdeng u Kyllyngkot bad u Risaw jong une u snem.
Kumba la ïathuh ka tyllong khubor, la ong ba u Myntri u la ong ha ka jingai jubab ba la phah da u nongïalam jong ka seng Congress u Kunal Patil ba ka Amravati Revenue Division ka la don shibun ngut ki nongrep kiba la ïap ha kane ka rukom ban pyndkut hi ïala ka jingim, ha kaba ka la don da 951 ngut baroh.
Shuh shuh ka tyllong khubor ka la ïathuh, “Ka sorkar Maharashtra ka la ïohpdiang ïa ka kaiphot kaba ong ba ki la don kumba 2,366 ngut ki nongrep kiba la ïap da kaba pyndkut hi ïala kajong ka jingim naduh u Kyllalyngkot haduh u Risaw jong une u snem. Ka tyllong khubor ka la ïathuh, ba hadien ka Amravati, ka jingdon bun jong ki nongrep kiba la ïap kum ha kane ka bynta ki dei kiba ha Chhatrapati Sambhajinagar Division, ha kaba ki la don 877 ngut ki nongrep, ha kaba la bud da 257 ngut ha Nagpur, 254 ngut Nashik, bad 27 ngut ha Pune. Kumba la ïathuh ka tyllong khubor, u Myntri u la ong, ” ka sorkar jylla ka la ai da kumba T. 1 lak kum ka bailutksan sha ki bahaïing jong ki nongrep kiba la shim hi ïala kajong ka jingim.”
