Moscow, Nohprah:
U President ka Russia- u Vladimir Putin ha ka sngi ba la lah, haba ai jingkren sha ki paidbah lyngba ka prokram ba kyrpang ba la pyni paidbah ha ki TV, u la ong ba kan nym don jingiasuk da lei-lei ruh hapdeng ka Russia bad ka Ukraine katba ki jingthmu bad ki thong jong ka Russia kim pat urlong lut kumba la pynbeit naduh kaba sdang. La ong ba ka long ruh ka sien ba nyngkong ïa utei u President ka Russia ba un ai jingkren da lade sha ki paidbah haba iadei bad kane ka mat. Namar naduh u snem ba la leit, u Putin u la shu pynsangeh lut ïa baroh ki jingialang ba la khot da ki lad pathai khubor ban iakren halor ki mat ba kongsan haba iadei bad ka thma hapdeng ka Russia bad ka Ukraine.
Hynrei, utei u nongialam jong ka Russia u la ong ba ka Russia kan sa lah ban ïasuk bad ka Ukraine lane kan lah ruh ban sangeh noh ïa ka thma tang haba ka la ioh ban pyndep bad pyn- urlong lut ïa ki jingthmu jongka baroh.
Hynrei kaba kham kongsan ïa ka Russia hapdeng jong kane ka thma ka long ban kyntiew ïa ka ioh- ka kot bad la ngeit ruh ba ka GDP jong ka ri kan kiew da kumno- kumno 3.5% hashwa ka ban kut noh jong une u snem 2023.
Katba, kaba kham sngewsih ruh ka long namar ba ki mar ki jingdonkam baroh ki la kiew dor lut bad kane ka la ktah jur ïa ka Russia khamtam haba kam shym la ioh lad shuh ban iadei kam bad kiwei pat ki ri kiba ka ju iadei kam baroh shi katta ha ki por ba la leit. Namar la ong ruh ba ka jingkiew dor ka lah ban kiew artet sa kumba 7.5% sha ka 8% ha ki por kut snem jong une u 2023.
Ia katei ka jingialang bad ki nongthoh khubor la pynlong hapoh Gostiny Dvor, kaba long ka jaka iadie iathied kaba heh bad kaba don ruh ïa ka ïing ‘Conference Hall’ kaba heh, hajan jong ka Red Square.
