Jowai, Nohprah 17
Ka Niaw Wasa United ka la ïoh rah biang ïa ka nam lahduh ka aiom ïalehkai Super Division Football Tour -nament-Kiang Nangbah Memorial Trophy 2023 ba la pynïaid da ka West Jaiñtia District Sports Association (WJDSA).
Kane ka nam lahduh ka la wan hadien ba ka Niaw Wasa United ka la pynliem noh ïa ka Ladthadlaboh Sports Club da 2-1 kol ha ka jingïakhun final kaba la long ha madan Kiang Nangbah Stadium, Jowai ha ka sngi Saitjaiñ.
Ka jingïalehkai ha ka kylla step ka la long kaba itynnad bad ïaryngkat bor shi kat dei namar ki rangïalehkai na baroh arliang kynhun ki la sei la ki buit ki bor ïalehkai ban ïakhun tyngeh ban ïoh rah ïa ka nam lahduh jong ka aiom ïalehkai Super Division hynrei ka kylla step ka la kut noh khlem don ba lah satia ban pynkhih jar.
Ha ka kylla miet, ka Niaw Wasa ka la ïalehkai bha bad ka la ïoh ban thep artylli ki kol ha ka minit kaba 58 ba la thep da u Civility Khongmalai bad ka minit kaba 60 da u Pynshai Lathong. Na ka liang ka Ladthadlaboh ka la lah ban pynphai shi kol ha ka minit kaba 86 ba la thep da u Sanki Langstang.
Kane ka jingïoh rah nam lahduh jong ka Niaw Wasa United ka la long ka sien kaba hynriew bad mynta ka kynti.
Hadien ka jingïalehkai, la sam ïa ka khusnam bad song pisa sha ka kynhun lahduh ka Niaw Wasa United kaba la ïoh ïa ka song pisa kaba T.50,000 (sanphew hajar tyngka) katba ka Ladthadlaboh ka la ïoh ïa ka song pisa kaba T.30,000 (laiphew hajar tyngka) ryngkat ka trophy.
La sam ruh ïa ka khusnam ‘Man of the Match’ sha u Dashngain Sukhlain, ka nam Best Goalkeeper la ïoh da u Pynshngainlang Tyngkra baroh arngut ki dei jong ka Niaw Wasa United, ka nam Top Scorer la ïoh da u Banteilang Shylla jong ka Ladthadlaboh SC uba la ïoh haduh 7 kol bad ka nam ‘Player of the Tournament’ la ïoh da u Risanlang-i Dkhar jong ka Niaw Wasa United.
Ïa ka jingïakhun final la wan ban sakhilang da u MLA ka Jowai Bah Wailadmiki Shylla, MDC Bah Octomewot Lamin, u District Sports Officer, West Jaintia Hills District Bah Khroobok Passah, u Working President WJDSA Bah EMH Passah, u General Secretary Bah Lammat-O Laloo, u Vice President Bah Patrick Lamare, Football Secretary Bah Nangebor Suting bad kiwei ki dkhot nongkitkam ka WJDSA nalor kiwei kiwei.
Ban kyntiew shuh shuh ïa ka kam ïalehkai phutbol hapoh ka District, u Bah Wailadmiki Shylla kum u kongsan ha ka jingkren, u la kular ba ha ka aiom ïalehkai Super Division ka ban wan un pynkiew noh ïa ka song pisa na ka 50 hajar sha ka shi lak tyngka sha ka kynhun lahduh, bad na ka 30 hajar tyngka sha ka 50 hajar tyngka sha ka kynhun kaba wan ba ar bad kane kan ïai neh katba u dang long MLA.
