Shillong, Nohprah 17
Ka Laitmawhing Sports Club ka la ïoh rung sha ka final jong ka Second Division ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad.
Kane ka jingïoh rung sha ka final ka la long hadien ba ka Laitmawhing SC ka la lah ban pynliem noh ïa ka Mawrohroh Sports Club da 2-1 kol kaba la wan lyngba ka jingïashut tie-breaker hadien ba ka jingïalehkai kaba la long ha ka sngi Saitjaiñ ha madan Tyrsad ka la kut noh ha ka jingïakhaid da mar shi kol.
Haba phai sha ka jingïakhun semi-final, ka la long kaba itynnad bad kaba ïabiang bor baroh ar liang bad ha kaba kut, ki la ïoh ban khyrwit mar shi kol. Dei ka Mawrohroh kaba la ïoh thep kol nyngkong lyngba u Regelbert Wanniang ha ka minit kaba 5 katba ka Laitmawhing pat ka la ïoh ban pynphai noh ïa kane ka shi kol ha ka minit kaba 45 ba la thep da u Kebin Khongsit.
Haba phai pat sha ki ar tylli ki jingïakhun jong ka kyrdan Third Division, ka Mawdngong Sports Club ka la jop ïa ka Nongthymmai Neng Sports Club da 1-0 kol bad ïa kane ka kol la ïoh pynthep da u bak (defender) jong ka Nongthymmai Neng SC (own goal) u John Khongsit ha ka minit ba 37.
Ha kawei pat ka jingïakhun, ka Wahnongkseh Sports Club ka la lah ban pynliem noh ïa ka Laitniangtlong Sports Club da 2-0 kol bad ïa kine ki kol la thep da u Dondor Nongbri ha ka minit ba 28 bad u Kyrshanlang Shabong ha ka minit ba 32.
Ha ka 18 tarik mynta u bnai pat, ka jingïakhun semi-final jong ka kyrdan Second Division kan long hapdeng ka Nongwah Sports Club pyrshah ïa ka Thainthynroh Sports Club ha ka por 12 baje mynsngi. Ha kane ka sngi, kan don ruh ka jingïalehkai semi-final jong ka kyrdan First Division, ha kaba ka Nongspung Sports Club kan ïakhun pyrshah ïa ka Pomsanngut Sports Club ha ka por 2 baje janmiet.
