New Delhi, Nohprah:
Ha kaba ïadei bad ka jingpynlut ha baroh kaba la long da T. 196.70 klur, ka seng BJP ka la pynshisha da kaba ong ba ka la pynlut da T. 149.36 klur ha kaba ïadei bad ki jingpyntreikam jong ka seng bad T. 47.33 klur la pynlut na ka bynta ki kyrtong ban ïakhun ilekshon.
Ka seng BJP ka la pynlut da kumba T. 196.7 klur ha kaba ïadei bad ka jingïakhun ïa ka ilekshon Assembly ha Karnataka ha basdang jong une u snem, palat 43% kaba la tam ban ïa ka jong ka seng Congress ka jingpynlut kaba la long T. 136.90 klur. Kane ka long katkum ka jingkhmih bniah na ki kaiphot ba la phah da kine ki seng ha kaba ïadei bad ka jingpynlut jong ki ïa kaba la phah sha ka Election Commission.
Na ka jingpynlut kaba la long ha baroh T. 196.70 klur, ka seng BJP ka la rai ba T. 149.36 klur ka la long ha ka jingpynnlut na ka bynta ki kam ba ïadei bad ki ilekshon jong ka seng bad T. 47.33 klur na ka bynta ki jingpynlut halor ki kyrtong.
Ka seng ka la pynlut kham bun ha kaba ïadei bad ka jingphah ïa ki byrta ki shula, ka jingphah shon ne Print, ki tiar ilektrik, ki jingphah ktien, ki jingpynbna ha ki Websites bad TV Channels bad kane ka la long da T. 78.10 klur.
Ka kaiphot ba la pynmih da ka EC ha ka sngi Palei, ruh ka la batai shai ha kaba ïadei bad ka jingsiew ïa ki jingpynbna ha ki TV Channels, ki kot khubor, Facebook, Google bad WhatsApp.
Ki jingsiew ha kaba ïadei bad ki jingpynlut haba leit ba wan ka jingpynlut na ka bynta ki nongïalap ilekshoh bad kiwei pat ki kam ba ïadei bad kiwei pat ki nongïalam la pynmih da ka seng BJP hapoh ka jylla ha kaba ka la poi sha ka T. 37.64 klur, katba ka shlem treikam jong ka sorkar kmie ka la pynlut da T. .8.05 klur ha kaba ïadei bad ka bai leit bai wan jong ki nongïalam.
Ka shlem treikam jong ka seng ka la pynlut ruh da T. 5.90 lak ha ka ban khmih bniah naduh ka 29 tarik u bnai Lber haduh ka 15 tarik, Jymmang.
Ka jingthep Vote ha Karnataka ka la long ha ka 10 tarik, Jymmang bad ïa ka jingñiew vote la pynlong ha ka 13 tarik, Jymmang.
Na ka pisa kaba la pynlut ha kaba ïadei bad ki kyrtong, kaba bun eh ka la long T. 34 klur ha kaba ka la leit sha ki kyrtong ha kaba ïadei bad ka jingsiew kaba khlem buh jingkheiñ.
Ka seng ka la pynlut ruh da T. 2.93 klur ha kaba ïadei bad ki jingpynlut halor ki jingshah mudui jong ki kyrtong halor ki kam ba ki la leh ha ki por ba la leit.
Ka seng Congress, kaba la jop ïa ka ilekshon ha ka jylla, ka la pynlut da T. 136.90 klur ha kaba T. 79.44 klur ka dei kaba la pynlut halor ki kam ba ïadei bad ka seng bad T. 45.6 klur na ka bynta ki kyrtong katkum ka jingphah jong ka ïa ka kaiphot ba la phah sha ka EC ha u Nailur.
