Amaravati, Nohprah:
Ka sorkar Andhra Pradesh hadien ba ka la dep ban sam ïa ki jaka sha baroh ki briew ki bym don ïing ka la thmu ban pynshna ïing noh na ka bynta jong ki katba ka aïom slap kam pat wan bad kumba la thmu, la ong ba ka jingshna ïa ki ïing kan long shwa na ka bynta kito kiba la ïoh ïa ki jaka kumba la dep ban pynkhamti ha ki.
Ka Andhra Pradesh Capital Region Development Authority (CRDA) ka la sam ïa ki jaka ban shna ïing sha ki 48,218 ngut ki briew kiba na ki longïing ki baduk na Krishna bad Guntur distrik, la ong ki heh sorkar. Ha ka jingheh bad ïar ha ki hynriew tylli ki shonng bad 1,135 akar ka jingheh, kine ki jaka ki la shah mang na ka bynta kito ki briew ki bym don ïing ha Mandadam, Inavolu, Krishnayapalem, Navuluru, Kuragallu bad Nidamanuru.”Ka sorkar jylla ka la pdiang bad pyntreikam ïa ka CRDA Act na ka bynta ban mang jaka sha ki briew ki baduk.
Katkum ka kyndon 41(3), (4) jong ka CRDA Act, ka sorkar ka la wanrah ïa ka R5 zone bad ka la wanrah ïa kiba bun ki jaka hapoh ka jingkhmih jong ka,” la ong u heh sorkar ha ka jingthoh ba la phah. Ka jylla ka la pynmih ïa ka jingthoh naduh ka sngi ba la ïarai bad ïakren bad ki paidbah ha u bnai Risaw jong u snem ba la lah. U Myntri Rangbah jong ka jylla u YS Jagan Mohan Reddy u la hukum ïa ki District Collector jong ka Krishna bad Guntur ba ki la dei ban pynkhreh ïa ka kaiphot kaba bniah halor ka jingpyntreikam ne ka Detailed Project Reports (DPR), ha ryngkat ki thup kyrteng jong ki nongïoh myntoi bad ban phah ïa ki sha ka CRDA.
Kumba la ong ka sorkar, la ong ba ki nongïoh myntoi jong kine ki jaka kin sa ïohpdiang ïa ki kot dulir ha ka bynta kaba lai jong ka ‘Navaratnalu Houses for the Poor Programme, kaba la ïatreilang bad ka GO ïa kaba dang pynmih shen ha kaba ïadei bad ka jingmang jaka sha ki briew ki baduk ha Amaravati. Ha kaba ïadei bad kane, u Reddy u la hukum ïa ki heh ba dei khmih ba ki la dei ban leh ei ei na ka bynta ban plie lad ban pynbiang ïa ki jingdonkam na ka bynta ban shna ïa ki ïing.
