Khliehriat, Nohprah 17
Ban ïoh ïa ka jinghikai ba paka bad janai naduh dangrit ha ka liang ka jingïalehkai phutbol, ka Rangdajied United Football Club (RUFC) ryngkat ka jingïatreilang bad ka Kyrmen Foundation kan pynlong da ka pro-kram ai jinghikai ei ïa 200 ngut ki khynnah jong ka thaiñ East Jaiñtia Hills District.
Ïa kane la pynbna da u trai ka Rangdajied United FC, u Bah Eugeneson Lyngdoh uba dei ruh u khlur ïalehkai phutbol barim ka Jylla, haba kren ha ka final ka Super Division Football League (3rd Kyrmen Shylla Contribution Trophy) ha ka Sngi Thohdieng.
U la ïathuh ba kane ka jingai jinghikai ei kan sdang ha u Kylla-lyngkot jong u snem 2024 bad ki khynnah ki ban ïoh jinghikai kin long naduh ka rta 5 snem haduh 15 snem kynthup shynrang bad kynthei.
Shuh shuh u la ïathuh ba shwa ka Free Coaching Camp, yn don shwa ka jingpyrshang (trial) khnang ban ïoh jied ïa ki khynnah kiba kynsai ki ban rung ha kane ka prokram ai jinghikai.
Nalorkata, u la pyntip ba ha ka Trail yn wan ïalam da ki Coach napoh ka Rangdajied United Football School, Shillong bad ki khynnah kiba shah jied kin ïoh pat ban rung ha kane ka shlem hikai ka ban pynlong arsien shi taiew.
U Bah Eugeneson u la ïathuh ba ka jingthmu ban pynlong ïa kane ka prokram ka long ba u angnud ban ïohi ba ki khynnah jong ka Jylla kin ïoh ïa ka kabu ban mihkhmat na ki klob bapher bapher hapoh ka ri kumjuh sha bar ri.
“Kumba long mynta baroh ki kwah ban long kita ki nongïalehkai phutbol, hynrei kumno ba kin ïaid ïa kata ka lynti, donkam ïa ngi ban ngin sara ïa ki naduh ba ki dangrit khnang ba kin long kita ki khynnah kiba kynsai ynda ki la heh namar ban shu ong baroh kin long nongïalehkai kata ka bym lah satia ban long,” la ong u Bah Eugeneson.
U khmih lynti ba lyngba kane ka prokram ai jinghikai, u don jingkyrmen ba kan wanrah ïa ka jingseisoh bad ba ka Jylla hi ruh ka don ïa ka jingangnud ban ïoh bun ki khynnah kiba kynsai kiba mih na kane ka thaiñ.
U la pynkynmaw ba napoh ka thaiñ Jaiñtia Hills, ka Jylla ka ïoh ban sei ïa u Redeem Tlang bad u Halen Nongtdu bad ha ka Rangdajied United FC ruh ki don haduh 10 ngut ki khynnah napoh ka thaiñ Jaiñtia Hills.
“Nga ïohi ba ka sap ka phong ka don shane bad na ka liang ka jong ngi, ngi don ka jingkyrmen bad ka jingngeit kaba skhem ba kin nang bun shuh shuh ki khynnah kiba kynsai ki ban mih na kane ka thaiñ,” la bynrap u Bah Eugeneson.
U la pyntip ba ïa kane ka prokram ai jinghikai yn pynïaid hi da ka Kyrmen Foundation, katba ïa ki Technical Expertise ka long napoh ka RUFC. Nalor kata, u la pyntip ruh ba ka RUFC ka don ïa ka Football School ha Mawlai, Maw-ngap bad kawei ka Girls Centre hapoh Pine Mount School.
U Bah Eugeneson u la ai khublei kyrpang ruh ïa ka Kyrmen Founda-tion kaba don ka jingkitkhlieh kaba khraw ban plie ka lad ka lynti ïa ki khun samla bad heprit jong ka dong ka thaiñ lyngba ka sap ka phong kaba ki don.
U kyntu ruh ïa ki kmie ki kpa ki khynnah ba kin shah ïa ki khun jong ki, kiba don ka sap ban wan sha kane ka prokram ai jinghikai khnang kin ïoh ka jingmyntoi kaba khraw.
