New Delhi, Nohprah:
Ki khynnah pule jong ka Jawaharlal Nehru University (JNU) mynta kin sa ïakynduh jingeh na ka jingtreikam ka kuna kaba T. 20,000 halor ka jingpynlong ïa ka jingïakhih, ka jingïakhih shah thngan bad ka jingïakhih ha ki bynta jong ki jaka pule ne hapoh ki jaka kiba don ha ka jingjngai kaba 100-meter jong kano kano ka jaka ai jinghikai, la ong ka hukum kaba thymmai kaba la wan na Chief Proctor’s Office (CPO).
Ka jingthoh kaba la don ïa ki kyndon bad ki jingpynïaid ryntih jong ki khynnah pule jong ka Jawaharlal Nehru University ka dei ka jingthoh kaba dang shen kaba la pynthymmai da ka skulbah na ka por sha ka por.
Ka la ong ba ka la kynthup ïa ki kyndon ba la pdiang bad buh da ka Executive Council jong ka JNU ha ka 24 tarik, Naiwieng.
Haba la ïakren bad ka Vice-Chancellor jong ka JNU ka Santishree Dhulipudi Pandit ka la ong ba ki kyndon ki dei kiba la dep ban buh lypa hashwa.
“Ngim shym la pynkiew ïa ka dor ha kaba ïadei bad ka jingdaiñ kuna. Ka la don lypa hangto. Ka la long tang namar ba ka Delhi High Court ka la bthah ïa ka JNU ba ka la dei ban buh jingthoh kaba long katkum ka aiñ ha kaba ïadei bad ka jingbuh ryntih ïa ki hukum. Ïa ka kot lyngkdop kaba la thoh ïa ki hukum la pdiang da ka Executive Council Meeting ïa kaba la pynlong ha u bnai ba la lah bad ha kane ka jingïalang la don ryngkat ruh ki dkhot jong ka kynhun ki nonghikai,” ka la ong.
“Ka bor pynïaid jong ka JNU hapoh jong nga kim pat daiñ kuna ïa ki khynnah pule kiba la pynlong ïa ka jingïakhih ha phyllaw jong ka jaka treikam. Ngi la weng noh ha kaba ïadei bad ka rai ban daiñ kuna ïa ki da ki heh nongpynïaid kiba hashwa,” ka la bynrap.
