Shillong, Nohprah 18
Ha ka sien kaba nyngkong eh kawei na ki nongmareh kaba na ka shnong Weiloi kaba hap hapoh ka Mawsynram Constituency, ka samla Ibanriakor Lyngkhoi kaba la khur ïa ka jongjop da kaba ka la wan ha ka kyrdan ba nyngkong ha ka Tata Steel Kolkata 25K, kaba la long ha ka sngi U Blei ha katei ka nongbah jong ka West Bengal.
Kane ka dei ruh ka sien kaba nyngkong eh ïa kane ka samla kaba dang 20 snem ka rta ba kan leit ïashim bynta ha katei ka jingïakop shabar Jylla ha kaba la wan ha ka kyrdan ba nyngkong eh napdeng ki nongïashim bynta kiba naduh 18 haduh 24 snem ka rta ha ka Open 25k ha kaba ka la lah ban pyndep ha ka shi kynta, 58 minit bad 19 sekhon.
Ïa ka kyrdan ba-ar la khur da ka Sima Nayek kaba la lah ban pyndep ha ki 01:58:49 bad ia ka kyrdan balai la ïoh da ka Geet Nakra (02:29:21).
Mar ïapoi ha ISBT kaba ha Mawïong ha ka janmiet jong ka lah sngi U Blei, na ka liang ka Weiloi Sports Club hapoh ka jingïalam u Bah Presius Kharnaior kum u Adviser lem bad kiwei, ki la pynkup burom ïa kane ka samla.
Watla kane ka samla kaba la wan na ka longiing kaba don hapdeng ki jingeh kiba bun bad ka bym ïoh jingkyrshan la ka long na ka long ka Sorkar Jylla ne na ki nongmihkhmat jong ka thaiñ, pynban ki don pat ki nongkyrshan kiba na sha lyndet kiba la kloi ban noh synñiang na ka bynta ban plie lad ïa ka ba kan poi shaduh Kolkata bad ban ïoh ïashim bynta ha katei ka jingïakob.
“Watla ngam shym la ïoh jingïarap eiei na ka Sorkar ne na ki nongmihkhmat jong ka thaiñ, hynrei ngam lah khlem da ai khublei nyngkong eh ïa i Mei i Pa kiba la btin lynti ïa nga, ka Weiloi Sports Club bad baroh kiba la kyrshan ïa nga ba ngan poi ïashim bynta ha katei ka marathon kaba la long ha Kolkata.”
“Watla ka dei ka sien kaba nyng-kong eh ïa nga ba ngan ïashim bynta shabar jylla, hynrei ngan ïai bteng ban nangïai trei shitom shuh shuh ban pynkhreh ïa kiwei ki jingïakob ki ban long shen nangne shakhmat,” ka la bynrap.
Ha kawei pat ka liang u Bah Presius u la pynpaw ka jingsngew-kmen halor kane ka jingjop ka Ibanriakor ha katei ka marathon kaba la long ha Kolkata.
U la pynpaw ka jingsngewnguh ïa u MDC ka Mawlai Constituency u Bah Teibor Pathaw uba la kloi ban noh synñiang na ka bynta katei ka samla kaba la ïoh ban ïashim bynta ha katei ka marathon.
