Turkey, Nohprah:
U Myntri ka tnat kam bar ri jong ka Turkey, u Hakan Fidan u la iakren bad u Secretary of State jong ka United States- u Antony Blinken ha ka Sngi U Blei ban pynbor ia ka United States ba ka dei beit ban kyntu katba lah ia ka Israel ba kan sangeh noh ia ka thma ha Gaza bad sha ka phang ka West Bank.
Ka Turkey ka kwah ia kitei ki 2 tylli ki ri ba kin ïasuk iasaiñ noh khnang ba ki paidbah nongshong shnong ka Gaza kin lait na ki jingma jong ka thma bad ha kajuh ka por ruh kin ioh ban im laitluid noh bad kin ioh ia ka bam- ka dih bad ki jingdonkam kiba man ka sngi kumba dei ban long barabor.
Namar la ong ba ka United States ka long ka paralok ba iajan tam bad ka Israel, bad kumta ka Turkey ka la kyntu ia ka United States na ka por sha ka por ba kan pyn kohnguh bad iai kyntu jur ia ka Israel ba kan sangeh noh ia ka thma ha Gaza namar ka la ktah jur ia ki paid nongshong shnong kiba lui-lui jong ka Palestine kiba don hapoh Gaza Strip.
Katkum ka jingkheiñ ba la ioh na ka kaiphod ba la pyllait da ki heh ka tnat ka koit- ka khiah jong ka Gaza tad haduh jong ka Sngi U Blei, la ong ba ki don palat 19,000 tam ki nong Gaza kiba la khlad bad duh noh ia ka jingim ha ka jinghiar thma bad jingther bom ba khlem sangeh jong ka Israel la ka long nalor suiñ, na duriaw bad na ryngkew ruh kumjuh.
Kumta, u Hakan Fidan u la pyntip sha u Antony Blinken ba ka jinglong- jingman hapoh Gaza bad ha West Bank ka la nang sniew bun shah ban ia kaba long baroh shi katta namar ka jingther bom bad jingpynhiar kput dusmon jong ka Israel pyrshah ia ki lehnoh Hamas kiba synshar ia ka Gaza.
Namarkata ruh u Fidan u la ong ba ka long kaba kongsan haduh katta ia ka Israel ba kan khot ia ka Hamas sha ka miej iakren ïasuk bad ban pynkut noh ia ka thma khnang ban ioh biang pat ia ka suk- ka saiñ ha baroh arliang ri kumba ka dei ban long bad kumba ka ju long baroh shi katta.
Ka Turkey ha kine ki khyndiat sngi ba la leit, ka la kynnoh ruh ba ka Israel ka la long hi thik kum kito ki ri lehnoh namar kam pyrkhat ne salia shuh ban shim ia ka jingim jong ki paidbah ba lui-lui kiba shong- ba sah hapoh Gaza tang ba kan ioh ban pyndep ia ka jingthmu bad jinghiar kput jongka ia katei ka kynhun lehnoh kaba synshar ha katei ka nongbah Gaza.
