Lancaster, Nohprah:
Uwei khyllung 4 snem u la duh noh ia ka jingim hadien ba uwei u kuli uba wan poi bakla u la leit sied bad ksam ia utei u khynnah ha janmiet jong ka Sngi Thohdieng hapoh Lancaster ha kane ka taiew ba la dep.
Ka tnat pulit jong ka Los Angeles ka la iathuh ba uwei u briew u la ther kuli sha ka kali jong ki bahaiing namar ka jingkynad bad jingkulmar. Hynrei da ka jing bakla, utei u kuli u la leit her bad dei pynban ia utei u khynnah uba shong shadien bad utei u kuli u la ksam ia ki bynta ba shajrong jong ka met jong u. Ha katei ka janmiet, ki nongïarap ki la ioh ban pynkit noh mar-mar ia utei u khynnah rit sha ka jaka sumar kaba don hajan eh hynrei tang mar ia poi ha jaka sumar hi ki bor pyniaid hospital ki la iathuh ba utei u khynnah u la khlad noh naduh ka por shuwa ban poi sha hospital.
Haba iadei bad kane, ki pulit ki la ioh kem noh ia uwei u rangbah 29 snem bad kawei ka briew 27 snem ka rta bad ki la shah rah sha ka patok kaba don ha Los Angeles ha katei hi ka miet Sngi Thohdieng, la iathuh ki lad pathai khubor na Los Angeles ha ka Sngi U Blei.
Katei ka jingjia la ong ba ka la jia ha ka por kumba 7:30 jong ka jan miet Sngi Thohdieng katba kitei ki bahaiing jong utei u khynnah ki dang iaid lyngba ia ka surok bah Sierra Highway hapoh Lancaster.
La ong ba utei u nongsiat ha kane ka jingjia, u thmu ban siat ia kitei ki bahaiing jong u kiba don lang ha katei ka kali ba utei u khynnah rit u shong. Hynrei da ka jingbakla, utei u kuli u la leit dei ia utei u khynnah uba shong sha ka bynta ba shadien jong katei ka kali ha katei ka miet.
Hadien kata, la ong ba u kpa bad ka kmie jong utei u khynnah rit, ki la leit ban pynkit noh ia u mar-mar sha ka hospital kaba don hangta hajan hynrei ki la ioh pdiang pat ia ka khubor ba sngewsih ba utei u khynnah u la khlad noh shuwa ban poi sha katei ka jaka sumar ha ka por kaba lyngkot.
La iathuh ruh ba kitei ki kmie-kpa jong utei u khynnah rit pat kim shym la mynsaw ne ngat ha kitei ki kuli ba la siat da utei u briew ha katei ka jingjia.
