Nongstoiñ, Nohprah 18
Ka kynhun ïalehkai jong ka Sawlad ka la ïoh ban khur ïa ka jingjop ha ka lympung ïalehkai NDSA Premier league Football Tournament 2023-24, hadien ba ka la lah ban pynliem noh da 2-0 kol ïa ka Nongpyndeng ha ka Lah Sngi U Blei ha madan NDSA kaba ha Nongpyndeng.
Kane ka nam jop ka la wan urlong lyngba u Wilson Ïawrwn uba la thep ha ka minit kaba 51 bad u Rishot L. Lawrynñiang ha ka minit kaba 90.
Shuh shuh ha kawei pat ka jingïalehkai, ka Tiehsaw Pengkyllut ka la jop da 2-0 kol ïa ka Tiehrit SC .
Haba phai pat sha ka jingïalehkai jong ka 1st Division, ka kynhun ïalehkai jong ka Nongkhlaw ka la ïoh ban khur ïa ka jingjop hadien ba ka la pynliem noh da 2-1 kol ïa ka Mawtynrong.
Na ka liang ka Football Committee ka la pyntip ba ka jingïalehkai ha ka sngi Ba-ar ha ka Super Division kan long hapdeng ka Pyndengrei pyrshah ïa ka Upper New Nongstoiñ ha ka por 2 baje janmiet.
