Gaza, Nohprah:
Ka khubor ba la ioh ka iathuh ba ka Lebanon, Egypt bad Jordan kin sa mad ïa ka jingduhnong haduh $10 billion tang na ka daw jong ka thma ha Gaza ha kaba kane ka thma ka la ktah shisha ïa ki ri ba marjan bad ha kajuh ka por ka kyntiew ruh ïa ka jingban jong ka jingkyrduh.
Ka kaiphod ba la ioh ka iathuh ba kine ki 3 tylli ki ri Arab ki la shah ktah ha kaba iadei bad ka khaii pateng bad kamai kajih bad ka United Nations Development Programme ha ka kaiphod ba ka la pynmih ka la iathuh ba kane ka thma ym tang ba ka la ktah ïa ki ri ba marjan hynrei wat ïa kiwei kiwei de ki ri ka pyrthei.
U U.N. Assistant Secretary-General u Abdallah Al Dardari uba long ha kajuh ka por u UNDP’s Director of the Regional Bureau for Arab States (RBAS) u sngew ba ka thma ha Gaza ka la pynmih ïa ka jingkordit kaba shyrkhei bha bad bun ruh ki don ka jingsngew sheptieng ba kane ka thma lada ka dang iai bteng kan sa wanrah ka jinghiran, ka jingkyrduh bam bad kiwei kiwei.
Hadien ba ka Israel ka la shah hiar thma ha ki lehnoh Hamas ha ka 7tarik u Risaw kala smai ba kan iai bteng ban ther bom ïa ka Gaza tad haduh ba kan da lah syndon ban rat dyngkhong ïa ki lehnoh Hamas.
