Seoul, Nohprah:
Katkum ki khubor la ong ba ka North Korea ha ka Lah Sngi U Blei ka la pynher biang sa uwei u ‘namding ‘Ballistic Missile’ ha ka shiteng synñia jong ka Sngi U Blei wat hapdeng ki jingmaham na ki ri ba marjan na ka por sha ka por.
U heh ka South Korea ha katei ka step Sngi Nyngkong u la iathuh ba ka North Korea ha ka miet ba la dep ka la pynher ia uwei u ‘namding sha ki bynta jong ka East Sea.
Kumjuh ruh ka sorkar Japan ha katei hi ka step ka la pyntip ba ka North Korea ka la siat ia utei u ‘namding uba la ikop ban dei u ‘Ballistic Missile’ khlem da pyntip ne ai jingtip eiei haba iadei bad katei ka kam.
Utei u ‘namding u la her kumba 570 Kilometre (354 Miles) shalor suiñ hashwa ba un leit hap bad bthei sha katei ka duriaw East Sea bad la ong ba ka South Korea, ka United States bad ka Japan ki la wad jingtip bha halor kane ba kin ioh ia ki jingtip ba bniah halor utei u ‘namding ba la siat bad pynher da ka North Korea ha katei ka miet.
Ka North Korea ha u snem ba la dep ka la pynbna ialade kum ka ri kaba khlaiñ bor tam ha ka liang ki kam Nuclear bad ka la ju kren ruh na ka por sha ka por ba kan nym sangeh ne phai dien noh na ka thong ba ka la buh bad kata ka long ban pynkiew bad pynkhlaiñ ia ki kam ‘Nuclear’ jong ka ri.
Kumjuh ruh ha une u bnai ba la leit, ka North Korea ka la seisoh ha ka jingleit buh ia u kor ‘Spy Satellite’ sha haw-haw hadien 3 sien ba ka la pyrshang ban leit buh ia ki kor Satellite hynrei kiba la pulom noh ha ki por bad ki snem ba la leit.
