Chennai, Nohprah:
U Myntri Rangbah jong ka Tamil Nadu u M K Stalin ha ka Sngi U Blei u la pyllait paidbah ïa ka jingsam ïa ka pisa kaba T. 6,000 kum ka jingïarap sha ki longïing kiba la shah ktah jur na ka jingkhie jong ka ‘erïong Michaung kaba la wanrah ïa ka jinghap jong u slap bajur bad ka jingshlei um.
Ka sorkar jylla ka la mang da kumba T. 1,486.93 klur na ka bynta ban pynbiang jingïarap pisa, ha kaba kin sa don kumba 25 lak tylli ki longïing ki ban sa ïoh jingmyntoi na kane ha kylleng ki distrik jong ka Chennai, Tiruvallur, Chengelpet bad Kancheepuram.
Hashwa kane, ka Tamil Nadu ka la dawa da T. 5,060 klur ka pisa kum ka jingïarap ba kyrkieh na ka sorkar kmie ha kaba ïadei bad ki jinglutksan kiba la mih na ki jingshah pynjulor na ka jingkhie jong ka ‘erïong ‘Michaung, la ong ka sorkar jylla.
Naba ka jingkhmih bniah ka dang ïai bteng na ka bynta ban lum jingtip halor ki jingshah pynjulor baroh, ïa ka kaiphot yn sa pynkhreh bad hadien kane yn sa pan shuh ïa ka jingïarap pisa na ka sorar kmie, la ong ki heh ba dei khmih.
Ka tyllong khubor, ka la ïathuh ba u Myntri Rangbah jong ka jylla u M K Stalin u la phah jingthoh sha u Myntri Rangbahduh u Narendra Modi naduh ki taïew ba la lah ha kaba la pan shwa ïa ka jingïarap pisa kaba T. 5,060 klur.
Ka sorkar jylla naduh ar sngi hadien ba la khie ka ‘erïong ha ka 4 tarik, Nohprah ka la ïakhun tyngeh ha kaba ïadei bad ka jingai jingïarap sha ki lanot, ka la ai shuti sha baroh ki nongshong shnong ka jylla.
Ha ka shithi kaba la phah sha ki nongbud jong ka seng DMK, u Stalin u la ong ba ka kynhun jong ka sorkar kmie kaba la lum jingtip halor ki jingtip kiba bniah halor ki jingjulor na ka ‘erïong kaba la wanrah ïa u slap bad ka jingshlei um ha Chennai bad ha ki thaiñ ba marjan, khlem da leh kam saiñ pyrthei ki la dei ban ai mynsiem bad ïatreilang bad ka sorkar jylla.
