Khliehriat, Nohprah 18
Ka samla Amethis Darnei ha ka sien kaba nyngkong jong kane ka aïom ïalehkai ka la khyrwit da ka hat-trick na ka bynta ban pynlong ïa ka Dkhiah West ba kan khur ïa ka jingjop ha ka ‘Women League East Jaiñtia.
Ïa kane ka lympung ïalehkai la pynïaid da ka East Jaiñtia Hills District Football Association (EJHDFA) ha madan Artificial Turf Diengshynrum, Khliehriat ha ka sngi Nyngkong.
Ha kane ka jingïakhun, ka Dkhiah West ka la pynjem khnap ïa ka Ïongkaluh SC haduh shidorjon (12-0 kol). Ïa kine ki kol la thep mar ar kol da ka Batbitbha Bareh & Russia Dkhar, saw kol la khyrwit da ka Amethis Darnei, katba ka Iris Dkhar, Phaintis Lyngdoh, Jingshisha Bareh bad ka Release Lyngdoh ki la thep mar shi kol.
Ha kawei pat ka jingïalehkai, ka Diengshynrum SC ka la bteng ban khur jingjop da kaba pynliem ïa ka Wapung Combine da 1-0 bad ïa kane ka kol la thep lyngba ka penalty ba la shut da ka Ibashisha Khongwet ha ka minit ba 68.
