Guwahati, Nohprah:
Ka nongbah New Delhi ka la pynkhlaiñ ïa ka jingpyntreikam na ka bynta ban lah pynlong ïa ka bynta kaba 11 jong ka Northeast Festival ka ban sa long ha Jawaharlal Nehru Stadium ha Delhi.
Kane ka tamasa ka ban neh lai sngi lynter naduh ka 22 tarik, Nohprah haduh ka 24 tarik, Nohprah ha kaba la batai shai ba kane ka long ban pyni pyrthei ïa ka jingriewspah ha ka liang ki buit jingstad bad ki pateng jait bynriew ha ryngkat ki jingpyninam ïa ki jngbam ba bun jait kiba bang bad kiba shngiam.
U Myntri jong ka tnat ki kam pohïing jong ka sorkar kmie u Amit Shah u la shah wer sngewbha na ka bynta ban plie paidbah ïa ka Northeast Festival ha kane ka sngi.
U G. Kishan Reddy, uba long u Myntri ka sorkar kmie uba dei khmih ïa ka tnat Culture, Tourism and North Eastern Region (Donor) Development; u Anurag Thakur, Myntri ka sorkar kmie jong ka Information and Broadcasting and Youth Affairs and Sports; Sarbananda Sonowal, Myntri ka sorkar kmie jong ka Ministry of Ports, Shipping and Waterways and AYUSH; u Myntri Rangbah jong ka Assam u Himanta Biswa Sarma ha ryngkat ki nongmihkhmat jong ki heh ki haiñ kumba la khmih lynti kin sa donlang ha kane ka jingrakhe lehkmen.
