New Delhi, Nohprah:
Ka kynhun bakyrpang jong ki pulit ka Delhi ki la hiar ban bteng ïa ka jingpyntreikam ha ki hynriew tylli ki jylla kiba kynthup ïa ka Rajasthan, Haryana, Karnataka, Uttar Pradesh, West Bengal bad ha Maharashtra na ka bynta ban pynlong ïa ka jingtohkit kaba bniah ha kaba ïadei bad ka jingjia kaba la jia ha ka 13 tarik, Nohprah hapoh Parliament na ka daw ka jingsynjor ha ka liang ka rukom treikam ki bor pahara.
Nalor kane, ki la don shuh sa kumba 50 tylli kiwei pat ki kynhun ïa kiba la dep ban thaw ha kaba ki la don bynta ban pynlong ïa ka jingtohkit kaba bniah halor ki Digital bad ki Bank bad kumjuh halor ka rukom im jong kiba la shah kynnoh donkti ha ka kam thombor. Kine ki kynhun ki la shimti ïa kine kiba la donkti ha katei ka ka thombor bad ki la buh ïa ki ha ka ïing kaba kyrpang ba kin lait na kino kino ki jingma ha ki hynriew tylli ki jylla. Uwei napdeng kiba la shah kynnoh ïa uba la tip kyrteng kum u Sagar Sharma, u dang shah tohkit ha ka kynhun kaba kyrpang ha ka kynhun jong ka Special Cell Saket, Southern Range.
U Lalit Jha, uba dei u snar nongïalam ha kaba ïadei bad ka kam thombor ha Parliament, u la shah aiti noh sha ka kynhun tohkit kaba ha Janakpuri, South Western Range. Kum ban shu pynkynmaw halor ka jingjia kaba la jia ha ka 13 tarik, Nohprah, ka Lok Sabha, ha kaba ka dorbar Tlang ka dang ïaid shakhmat ka la sakhi ïa ka jingjia thombor ba la leh da ki arngut ki runar kata u Sagar Sharma bad u Manoranjan D ha kaba kine ki la kynthih na ka jaka shong ki riewpaidbah shapoh ka jaka shong dorbar ha ka kynta kylli jingkylli. Kine ki la kawang bad pynlynguh da ka tdem rong stem ha kaba ki la shah bat noh ha ki dkhot jong ka ïingdorbar bad shahkem ha ki pulit.
