Shillong, Nohprah 18
Ka Bouncers Association of Meghalaya (BAM) ha ryngkat ka jingïasnoh kti lang bad ka Treilang Welfare Society, kan pynlong ïa ka rynsan ïakhun kti ba la tip kum ka Shillong Arm Fight, 2023 – All lndia Championship ha ka Sngi Balang bad Sngi Palei ha U Soso Tham Auditorium, Shillong.
Ha kane ka jingïakob yn wan ïashim bynta da ki khlur ïakhun kti na ka Jylla bad nabar Jylla ha kaba yn wan ban plie da ka Myntri ka tnat ka koit ka khiah jong ka Sorkar Jylla ka Dr. Ampareen Lyngdoh ha kaba yn ïadonlang ki khlur Bollywood bad kiwei.
Haba ïakren bad ki nongthoh khubor ha ka Lah Sngi U Blei, u President ka BAM u Bah Junestar Kharbuli u la ïathuh ba kane ka rynsan ïakob yn wan ïashim bynta da ki nongïakhun kti na kylleng ki jylla jong ka ri. “Na ka thaiñ shatei lammihngi yn wan ïashim bynta da baroh ki nongïalehkai, katba na ki jylla jong ki ri ki kynthup na Utter Pradesh, Delhi, Kerala, Haryana bad kin dangdon kiwei pat ki nongïalehkai ki ban dangpynthikna haduh ka sngi Ba-ar.”
U la ï athuh ruh ba ki khlur ïalehkai ka Jylla ki ban ïashim bynta ki kynthup ïa ka Kong Margareth Pathaw, u Alan Sun, Shanborlang Siangshai, Hubert Paliar, ka samla Aiboklin Rina bad kiwei.
“Te kumta ngi kyntu ïa ki paidbah ba kin wan sakhi ïa kane ka lympung bad ruh ban ai mynsiem ïa ki khlur ïalehkai ka Jylla. Shabar jong ka U Soso Tham Auditorium, kin don ki jingïalehkai bapher bapher ki ban pynrngia ïa ki khynnah, ki jingbam tynrai bad kiwei,” u la bynrap.
Ïa kane ka program kaba ar sngi la kyrshan lang da ka tnat ïalehkai jong ka Sorkar Jylla bad kiwei kiba la kloi ban noh synñiang sha kane ka synjuk.
Na ka Liang ka organizing committee ka la pynkhreh da ki khusnam pisa kiba 2.15 lak tyngka na ka bynta ki nongjop ha la ki jong ki kyrdan.
