Amlarem, Nohprah 19
U Myntri ka tnat ïalehkai ka Sorkar Jylla u Bah Shakliar Warjri u la pynbna paidbah ba ha u snem thymmai jong u bnai Rymphang yn sdang noh ka kam ban siang phlang plastik ha Mini Stadium Ladjaplem kaba ha Amlarem.
Ïa kane u Myntri u la pynbna haba kren kum u kongsan ha ka sngi pynlut ïa ka lympung ïalehkai Super Division Football League ba la pynïaid da ka Amlarem Sub Division Sports Association (ASSA) ha ka sngi Ba-ar ha Mini Stadium Ladjaplem, Amlarem.
Ha ka jingïakhun phainal, ka Seinbhalang Shkentalang ka la ïoh ban rah ïa ka nam lahduh jong kane ka aïom ïalehkai hadien ba ka la pynliem ïa ka Amlarem Social Club da 1-0 kol.
U Abul Laskar u la kylla long u nam tam jong kane ka lympung ha kaba lyngba ka kol kaba u la thep ha ka minit kaba 65 ka la biang pura ïa ka Seinbhalang Shkentalang ba kan khur syndon ïa ka nam lahduh jong kane ka aïom ïalehkai.
Hadien ka jingïakhun u kongsan ryngkat u MLA ka thaiñ u Bah Lahkmen Rymbui ki la sam khusnam sha ka lahduh ka Seinbhalang Shkentalang da ka song pisa kaba T. 60,000 (hynriew phew hajar tyngka) bad ka kynhun kaba wan ba-ar ka Amlarem Social Club ka la ïohpdiang T. 40,000 (saw phew hajar tyngka) ryngkat ka trophy.
La sam ruh ïa ki khusnam shimet kum ka ‘Best Player’ ba la ïoh rah da u Ïaidakyrmen Jungai Amla-rem SC, ka nam ‘Best Goals Keeper’ ka leit sha u Wanlambok Tariang na ka Seinbhalang Shkentalang bad ka nam ‘Top Scorer la rah da u Dongmi Surong na ka Umladkhur SC.
