New Delhi, Nohprah:
U Myntri Rangbah jong ka Delhi u Arvind Kejriwal uba la shah khot hajir ha ka kynhun Enforcement Directorate, u la leit ban ïakynduh ïa ka kynhun jong ki nongïalam ka liang pyrshah kiba la don ha Delhi ha ka Lah Sngi U Blei na ka bynta ka jingïalang jong ka kynhun synrop INDIA.
Ha ka step jong kane ka sngi u la ïakynduh ïa ka Myntri Rangbah jong ka West Bengal ka Mamata Banerjee.
Ym shym la tip kiei ki jingïakren ne halor kino ki mat ba ki la ïakynduh ha ka por ba la don ka jingïakynduh jong ki kaba long 45 minit.
Ka jingïalang ba la long bad u Uddhav Thackeray bad u nongïarap baïajan jong u u Sanjay Raut ka la long ha ka janmiet jong kane ka sngi.
Ha ka sngi Ba-ar kumba la mut lypa u la ïakynduh bad u Myntri Rangbah jong ka Tamil Nadu u MK Stalin.
Ka kynhun Enforcement Directorate ka la khot hajir ïa u Kejriwal na ka bynta ban kylli jingkylli halor ka mukotduma kaba la mudui halor ka jingkynnoh ba ka la don ka jingdkoh treikam ha kaba ïadei bad ka kyiad ha ka 21 tarik, Nohprah.
ane ka dei ka sien kaba ar ba ka kynhun tohkit ka la khot hajir ïa u heh nongïalam jong ka seng Aam Aadmi Party. Hashwa u la shah khot hajir ha ka 2 tarik, Naiwieng.
U Kejriwal u la ïaid lait halor ka jingshah khot hajir bad ha ka jaka kane, u la leit ban don bynta ha ka jingïalap ilekshon na ka bynta ka seng jong u ha Madhya Pradesh.
