Haduh 141 ngut ki MP ka Lok Sabha bad Rajya Sabha ki la shah sospon ha u Lamphang bad Shongknor haduh ka 19 tarik Nohprah, 2023 ha ka Dorbar Tlang jong ka Parliament, bad kane ka dei ka bym pat ju kham jia mynno-mynno ha ka mynnor jong ka Ïingdorbar Thawaiñ ka Ri. Kine ki MP kiba la shah sospon ki dei na ka liang pyrshah bad ki la dawa ba u Myntri Korbar Ri, u Amit Shah, un ai jingkren ha baroh artylli ki Ïingdorbar Thawaiñ halor ka jingïoh rung jong ki arngut ki ‘riew paidbah ha Lok Sabha ha ka taïew ba la lah ha kaba ki la lah ban kynthih sha ka lympung ba shong ki MP bad kawang da ki tyndong lyer kaba la pynsyier ïa ki MP. Hynrei na ka liang ka sorkar National Democratic Alliance (NDA) ba la ïalam da ka Bharatiya Janata Party (BJP) kam shym la pdiang satia ïa kane ka jingdawa ka liang pyrshah bad namarkata, ka sa mih ka jingïakynad hapoh Lok Sabha bad Rajya Sabha.
Kane ka rukom ïakynad hapdeng ka liang synshar bad ka liang pyrshah kam long kaba bha. Ka jingshah sospon jong haduh 141 ngut ki MP ka liang pyrshah ka pyni ruh ba ka sorkar ka leh donbor bad kam kwah ban sngap ïa ka jingdawa jong ki. Kan eh aïu ïa u Myntri Korbar Ri ban ai jingkren ha Lok Sabha bad Rajya Sabha halor kaei kaba la jia ha ka 13 tarik Nohprah, 2023? Lada ai jingkren, lehse ka jingïakynad ka la shu kut noh kumto. Da kaba ym ailad ban pynthanda ïa ka jingïakynad, ka sorkar ruh ka ïoh leh katba mon ban ïoh jingmynjur halor ki aiñ rew (Bill) kiba ka la wanrah ha Lok Sabha bad Rajya Sabha. Ki don ki aiñ rew kiba donkam bha ban ïathir na ka liang pyrshah. Hynrei haba kam don ka jingïaid beit, ka suk palat ïa ka liang synshar ban ïoh jingmynjur khlem da donkam ban ïatai. Kane ka pynïap ïa ka jingsynshar paidbah. Ki ju ong ba ka dei ban don ka jingïatai bad jingïarai ha ki Ïingdorbar Thawaiñ bad ki arliang mamla ki dei ban ïoh por ban ïathir ha ka rukom kaba dei namar ki aiñ ki ktah salonsar. Lada kam don ka jingïathir, kam don jingmut ïa kita ki MP ban leit sha Lok Sabha bad Rajya Sabha.
Ha ka jingsynshar paidbah, donkam ïa ka liang synshar kaba skhem bad ka liang pyrshah kaba khlaiñ khnang ban don ka jingïabiang. Lada khlaiñ tang shiliang, kan long kaba eh bad kaba ma. Hynrei na ka snem sha ka snem, ngi ïohi ba kata ka Parliament kam dei shuh ka shlem thaw aiñ, bad ka la kylla long pynban ka ïew luri-lura namar ka jingïakynad kaba la long palat liam hapdeng ka liang pyrshah bad ka liang synshar. Ngi ïohi ruh ba ki nongpynïaid ïa ka Parliament la u dei u Lamphang lane Shongknor, kim da don shuh ka iktiar ban lah ban pynshong khop ïa ki MP kiba pynkulmar shnong. Ka jingburom ïa ka shuki Lamphang bad Shongknor ka la nang duh bad kane ruh ka buh jingma shikatdei ïa ka jingsynshar paidbah. Haba ki MP kim sngap shuh ïa ki nongpynïaid Dorbar, shaei ka Ri kan poi? Haba ka liang synshar ka shu kwah beit ban leh katba ka mon tang namar ka jingbun paid, shaei ka Ri kan poi? Haba ka liang pyrshah ka shu nang tang ban pynkulmar shnong, shaei ka Ri kan poi?
Kum ki paidbah kiba don ïa ka iktiar ban jied ïa ki MP sha Lok Sabha, ngin hap ban ïa puson bha halor kine kiei-kiei. Ngim lah ban don ïa ka sorkar kaba leh donbor bad ïa ka liang pyrshah kaba pynkulmar shnong. Ngi donkam ïa ki aiñ kiba long janai hadien ka jingïathir ka jingïatai hapdeng ki arliang mamla namar ki aiñ ki ktah jur ïa ngi ha ki liang bapher-bapher. Kawei na ki jingshah ktah na ki aiñ ka long ka jingim ba laitluid ym ba laitlan. Ngin buh jingma dalade ïalade lada ngim long kiba husiar na ki aiñ sorkar. Ka jingduna ha ka jingpeitngor ka pynlong ïa ngi ban shah teh shah khum ha ki aiñ bad ka jinglaitluid kan nang jngai na ngi. Ka jingpeitngor kaba ïaineh kan pynthikna ba ngin ym duh ïa ka jinglong laitluid ka jong ngi. Lada ngim long kiba peitngor, ngin duh lut ïa ka jinglaitluid kaba khyndiat kaba ngi don mynta.
