Palestine, Nohprah:
Katkum ki khubor la ong ba ka Israel ha kane ka kynti ka la hap ban shah ia ki jingkren bad jingkynthoh na kiba bun ki liang haba iadei bad ka jinghiar thma ba khlem sangeh jongka pyrshah ia ka kynhun lehnoh Hamas hapoh Gaza Strip jong ka ri Palestine.
Kane ka long ruh hadien ba ka UN ka la khot thymmai biang ia ki tnat bad ki ri bapher ba kin ai jingkyrshan biang ban phah sangeh noh ia ka thma jong ka Israel hynrei dei tang ka United States marwei kaba dang ai jingkyrshan bad pynshlur ia ka Israel ban iakhun pyndep beit ia ka thma pyrshah ia ki lehnoh Hamas bad ba kan nang iai bteng ia ka jingphah jingiarap da ki tiar iakhun thma khnang ban ioh tehlakam ia ki kam thombor jong kitei ki lehnoh Hamas bad ha kajuh ruh ka por kan long ka jingiada naka bynta kiwei pat ki ri kiba lah ban shah thombor biang ha kitei ki lehnoh hadien- habud lada pyllait bad pynkut noh ia ka thma ha kane ka kynti.
U Myntri ka tnat kam bar ri jong ka Britain, u David Cameron u la dei ban leit kynduh ia ki nongialam ka France bad Italy naka bynta ban shong jingialang bad ban ia pynbeit lang kumno ban lah ban pynsangeh noh ia ka thma hapdeng ka Israel bad ki lehnoh Hamas jong ka Palestine.
Ka thma hapdeng ki lehnoh Hamas bad ka Israel ka la sdang naduh ka 7 tarik u Risaw hadien ba ki lehnoh Hamas na Gaza ki la sdang ban ther bom naphang sha Israel bad ki la leit ruh ban khrai khlieh haduh ha iing- ha iing ia ki paidbah nongshong shnong ka Israel. Ha katei ka 7 tarik u Risaw, ki lehnoh Hamas ki la rahbor ruh ia kat kiba kloi ban ioh kem naduh ki khyllung- khynnah, ki tymmen bad ki kynthei bad haduh mynta ka Israel ka dang ialeh ban ioh pyllait noh ia baroh kitei kiba la shah rahbor ha ka Hamas.
Ka tnat ka koit ka khiah jong ka Gaza ka la pyntip ruh ba ka jingpynhiar kput jong ka Israel ia ka Gaza ka la shim ia palat 19,400 ngut ki mynsiem briew tad haduh jong kane ka step Sngi Ba-ar ba la ioh ia kane ka kaiphod jong ka jingkheiñ ba thymmai haba iadei bad ka jingdon jong kiba khlad na ka thma jong ka Israel ha Gaza.
Ha ka jingleit jurip sha Israel ha kine ki khyndiat sngi ba la leit, u heh ka tnat iada jong ka US- u Lloyd Austin u la kular ba ka United States kan nang iai bteng ban ai jingkyrshan ia ka Israel wat haba kiba bun kiwei pat ki ri bad ki tnat bapher jong ka pyrthei ki la kynthoh bad daw ia ka Israel ba ka dei ban sangeh bad pynkut noh ia kane ka thma.
