Haflong, Nohprah:
Ki la don palat 50 ngut ki nongïalam bad ki nongbud jong ka Indian National Congress bad ka Bharatiya Janata Party kynthup u Ngamsei Hengna, uba long u dkhot barim jong ka NCHAC bad u dkhot jong ka seng BJP ha Dima Hasao, u Lalneisiem Hengna, uba long u dkhot jong ka seng Congress ha Dima Hasao bad baroh kawei ka Mandal committee of Mahur INC kiba la leit ban pynïasoh bad ka seng Trinamool Congress ha ka prokram pynrung dkhot kaba la long ha ka shlem treikam jong ka seng ha Dima Hasao ha ka sngi Saitjaiñ.
Ha ka jingleit ban pynïasoh bad ka seng TMC, ki nongïalam na kiwei pat ki seng saiñ pyrthei kum ka BJP bad Congress ki la ong ba ka seng TMC ka la ïoh jingkyrshan bha ha Dima Hasao bad kyrmen ba ka seng TMC ha Dima Hasao kan sa lah ban leh bha ha ka ilekshon ka ban wan sha ka 13thNC Hills Autonomous Council ka ban long ha ka 8 tarik, Kyllalyngkot, 2024.
U Aching Jeme, uba long u President jong ka seng TMC ha ka distrik u la ong ba ka jingleit pynïasoh jong ki nongïalam na ka seng BJP bad Congress kin sa lah ban wanrah jingjop ha ka jingïakhun ïa ka ilekshon ha u snem ban wan.
U Jeme shuh shuh u la ong ba ïa ka thup kyrteng jong ki kyrtong yn sa pynbna ha ka 19 tarik bad ka seng TMC kan sa pynïakhun ïa ki kyrtong ha ki 15 haduh 20 tylli ki konstitwensi na ka bynta ka ilekshon 13th NHAC.
