Erez, Nohprah:
Ki shipai ka Israel ha ka Sngi U Blei ki la pynbna ba ki la lap sa ia kawei pat ka lynti krem ba shapoh khyndew ba ju pyndonkam da ki Hamas ba katei ka long ka lynti krem kaba heh tam hapoh Gaza katkum ba la lap bad shem da ki shipai ka Israel haduh kane ka kynti.
La ong ba wat ki kali kiba rit ruh ki la lah ban iaid lyngba bad leit rung na kitei ki krem kiba don shapoh jong ka khyndew.
La ong ba katei ka lynti krem ka la jrong kumba 4 kilometre lane 400 kilometre bad lada kheiñ da ka jingiaid kjat pat ka la poi 1,300 phut ka jing jngai.
Nalor kata, la ong ba kan shim por da ki snem bad yn hap ruh ban pynlut da ki Million Dollar ban tei bad shna ia kum kitei ki krem ban iaid lynti napoh khyndew.
Ki shipai ka Israel ki la pyllait ruh ia ka video kaba la iohi ia ki lehnoh Hamas kiba dang iatreikam ha katei ka krem ban pynkit ia ki tiar ki tar bad ki jingdonkam jongki lyngba jong katei ka lynti krem. Ha kajuh ka por ruh ki shipai ka Israel ki la pyntip ba la lap ia shibun bah ki tiar siat bad tiar pynbthei kbia la buhrieh bad buh khop ha katei ka jaka.
