Saipung, Nohprah 19
Ka Mulait United FC ka la rah ïa ka nam lahduh ha ka lympung ïalehkai Super Division Football League ba la pynïaid da ka Saipung Block Sports Association (SBSA), hadien ba ka la lah ban pynliem noh ïa ka Lamyrsiang SCC da 1-0 kol ha ka jingïakhun final kaba la long ha ka sngi Ba-ar ha madan ialehkai Lamyrsiang.
Kane ka nam jop ka la wan urlong lyngba ka shi kol ba la thep da u Sani Phawa.
Watla ka jingïakhun ka la long kaba tynnad bad kaba ïakhaid bha, hynrei hadien shiteng kynta ba ka Mulait ka la ïoh ban pynkhih jar nyngkong eh lyngba u Sani Phawa ha ka minit kaba 38.
Hadien katto katne por ki rangïalehkai ka Lamyrsiang ki la pyrshang ban pynphai, hynrei kim shym la lah ban pynurlong bad ha kaba kut ka la mad ïa ka jingshah rem.
Ïa ki khusnam lahduh bad ba wan ba-ar sha kitei ki kynhun la sam da u kongsan u Bah Defend Pakem ha ka jingdonlang u Bah Jikham Syrti bad District Sports Officer (DSO) West Jaiñtia u Bah Khroobok Passah.
Ka lahduh ha kane ka lympung ka la ïohpdiang ïa ka song pisa kaba T.50,000 (sanphew hajar tyngka) katba ka Lamyrsiang SCC ka la ïoh T.30,000 (laiphew hajar tyngka) ryngkat ki trophy.
La sam ruh ia ka khusnam ‘Man of the Match’ sha u Jeffre Surong, ka nam ‘Goalkeeper of the Tourna-ment sha u Sbing Chyr-mang, kiba dei ki rangïalehkai ka Mulait United FC, katba ïa ka nam ‘Top scorer’ la ïoh da u Go Gou Hangshing uba la thep 15 kol ha kane ka aïom bad ka nam ‘Player of the Tournament’ la ïoh da u Lamphrang Paslein, baroh angut ki dei na ka Lamyrsiang SCC.
