Itanagar, Nohprah:
Ki pulit jong ka Arunachal Pradesh ki la kem ïa ka Sadhvi Devkriti ba la tip ruh kum ka Mataji, kaba la shah kynnoh ba ka la pynshitom beiñ bad shoh ïa ki khynnah jong ka Acharyakulam, ka skul Primary ba la pynïaid da ka Patajanli Ayurveda Pvt Ltd ha Itanagar kaba hap hapoh ka Pakke-Kessang distrik.
Ka Sadhvi Devkriti, kaba dei ka nonghikai Sanskrit, ka la phet rieh hadien ba ki pulit ki la buh da ka jingmudui mukotduma pyrshah ïa ka ha ka 10 tarik, Nohprah ha ka jaka treikam jong ki ha Itanagar. Ka Sadhvi ka la shah pynngat hapoh ka kyndon Juvenile Justice Act halor ka jingpynshitom beiñ ïa kiba bun ki khynnah skul kiba dang rit, la ïathuh u Superintendent of Police (SP) jong ka Pakke Kessang u Tasi Darang ha ka Sngi U Blei.
Ka Devkriti, ka la shahkem na ka shnong jong ka na Hasanpur kaba hap hapoh ka Fatehpur distrik ha Uttar Pradesh ha ka Sngi Saitjaiñ, la ong u SP. Ka mukotduma hapoh ka kyndon 342/323 jong ka IPC, ha ryngkat ka kyndon 75 jong ka JJ Act, la pyngnat pyrshah ïa ka ha ka jaka treikam jong ki pulit ha Seijosa, u la ong.
U heh pulit u la ong ba kane ka jingjia ka la paw pyrthei hadien ba ki kmie ki kpa jong uwei u khynnah uba la shong ha ka klas 1 ki la ïohi ïa ka jingjngem ka met u khun jong ki, ha kaba hadien ba ki la tip ba u la shah shoh ha skul ki la leit ujor da ka ejahar sha ki pulit ka Seijosa ha ka 10 tarik, Nohprah.
Ki la don kumba 20 ngut ki khynnah skul kiba shong ha ka klas 1 haduh klas 4 kiba ju shah pynshitom beiñ ha ka Devkriti. Kumba la ïoh jingtip, la ong ba kine ki khynnah ki ju shah byrngem byrsit ha ka lada jia ba ki ïathuh ha ki kmie ki kpa jong ki ba ki shah shoh ne shah pynshitom.
