Shillong, Nohprah 19
Ar ngut ki khynnah kiew lum ka Jylla hapoh ka lama jong ka Meghalaya Sport Climbing & Mountaineering Association (MeSCMA) kin pynkhreh ban leit ïashim bynta ha ka 27th IMF National Climbing Championship ka ban long ha Bangalore ka ban sdang naduh 21 haduh 23 tarik u Nohprah mynta u snem.
Kine ki kynthup ïa ka Dadapbiang Lyngdoh bad u Bhabok Nongkhlaw kiba na Upper Lumparing, Shillong.
Kane ka jingïoh lad ban leit ïashim bynta ka la wan hadien ba ki la lah ban pynpaw ïa ka jingtbit ha ka North East Zonal Sport Climbing Championship kaba la kut dangshen ha IHCAE, Chemchey, Sikkim.
Ïa kine ki khynnah yn ïalam da u Bah Wallambok Lyngdoh, katba ka Kong Kayleigh Petra Nongkynrih kum ka Route Judge.
Ïa kane ka prokram yn pynlong da ka Indian Mountaineering Foundation bad ka General Thimmayya National Academy of Adventure.
Lyngba kane ka lympung, lai ngut ki ban khur takma ha ka kyrdan seniors, juniors bad sub-juniors kin ïoh ban mihkhmat ha ki 7 tylli ki zone jong ka ri kaba kynthup ïa ka North Zone, West Zone, South Zone, East Zone, North East Zone, Services Zone and Police Zone.
Na ka liang ka synjuk ka la ai khublei ïa ka tnat ïalehkai jong ka sorkar Jylla kaba la kyrshan jingïarap pisa na ka bynta ki khynnah bad kumjuh ïa u Commandant jong ka 58 GTC, Happy Valley uba la ai jingbit ban pyndonkam ïa ka climbing wall ban pynkhreh ïa katei ka jingïakop ka ban long ha Bengalore.
