Shillong, Nohprah 20
Ka Mawlum Tyrsad SC ka la jam sha ka final ha ka lympung ïalehkai First Division Football League ba la pynïaid da ka Tyrsad Area Sports Association (TASA) hadien ba ka lah ban pynliem noh ïa ka Mawponghong SC lyngba ka tie-breaker da 5-4 kol ha ka sngi Balang ha madan Tyrsad.
Ha kane ka jingïakhun semi final baroh ar ki kynhun ki la pyrshang ban ïakhun tyngeh naduh kaba sdang. Ka Mawlum Tyrsad ka la pynkhih jar nyngkong eh lyngba u Banshem khongsit ha ka minit kaba 26 na ka bynta ban tam shi kol ha ka kylla step. Hynrei dei ha ka kylla miet ba ka Mawponghong ka la lah ban pynphai kylla lyngba u Juban Mylliem ha ka minit kaba 68 na ka bynta ban ïakhaid mar shi kol.
Haba phai sha ka jingïakhun semi final jong ka Third Division, ka Mawkynroh SC ka la pynliem noh ïa ka Wahnongkseh SC lyngba ka shi kol ba la thep da u Banlamshwa kharbani ha ka minit kaba 41.
Na ka liang ka TASA la la pynbna ban pynlong ïa ki jingïakhun final na ka bynta baroh ar tylli ki kyrdan ïalehkai ha ka 23 tarik mynta u bnai. Ka jingïakhun ha ka 3rd Division kan long hapdeng ka Mawdngong SC pyrshah ïa ka Mawkynroh SC ha ka por 10 baje mynstep, katba ha ka 2nd Division ka Laitmawhing SC ïa ka Thaiñthynroh SC ha ka por 11:30 mynstep bad ha ka 1st Division ka Mawlum Tyrsad SC kan ïakhun pyrshah ïa ka Pomsanngut SC ha ka por 1:30 noh phai sngi.
