Tel Aviv, Nohprah:
Hadien ba ka Palestitne ka la mad ïa ka jingkyrduh bam mynta kane ka ri ka la mad ruh sa ïa ka jingshah lynshop ha kaba iadei bad ka jingwan u slap tlang ha kaba kane ka jingwan u slap ka la ktah shisha ïa ki nongshong shnong ka Gaza kiba nalor ka jingduhnoh ïa ki iing ki sem mynta ki la hap ruh ban shah ïa ka jingkhriat kaba tasam bha.
Ka kaiphod ba la ioh ka iathuh ba haduh 85 percent ki nongshong shnong ka Gaza kim don iing don sem shuh ban shong ban sah bad kila hap ban shu ap ïa ka jingai jingiarap jong kiwei kiwei ki ri. Ka thma hapdeng ka Israel bad Hamas ka la ktah shisha ïa ka Gaza bad ki briew ka Gaza ki la hap ruh ban mad sa kawei de ka jingeh nalor kane bad kane ka dei ka jingwan ka lyer khriat bad ka jinghap slap bad lada kane ka jingkhriat kan dang jur ha kine ki sngi ban wan la tikna ba bun ki mynsiem kin duhnoh.
Ka jingkhriat ba tasam ka la ktah ïa kito ki nongshong shnong ka Gaza kiba la hap ban sah ha ki iingdara hadien ba ki iing ki sem kila shah pynjulor lut ha kaba ki la sngewthuh shisha ïa ka jingeh bad ka jingkordit na ka jingbym don ki kor ki bor ki ban pynsyaid bad ai jingiada na kane ka jingkhriat.
Ki nongshong shnong Gaza ha ka jingai jingkren sha ki nongthoh khubor ki la pynpaw ba ki sngew ialade kumba ki im ha dujok ha kaba ka jingkordit ka long kaba shyrkhei haduh katta katta. Uwei u briew uba la shong la sah bad la ki jong ki bahaiing ha ki iingdara ula ong ba ka um slap ka la ioh ban rung shapoh bad ki jain ki nep bad ki jaka thiah jaka dem ki la jhieh lut bad um banse ban wad da ki shyiap bad ki maw ban tap ban lait na ka jingsam jong ka umslap. Kane ka jinghap slap ka la pynshlei um ïa kiba bun ki surok bad lynti syngkien bad ktah shisha ïa ka jingim jong kiba bun.
Ka kaiphod ba la phah da ka World Food Programme (WFP) ka pyni ba kumba 91 percent ki nongshong shnong ka Gaza ki la thiah khlem bam bad ki don ki briew kiba shong basah sha ki jaka kiba dang kham long khlaw ki la shu bam kat kaba ki ioh ei na ki khlaw ki btap tang ban lait iap.
