Ha kine ki sngi, ka jingïakren ka la mih hadien ba u MDC ka United Democratic Party (UDP), Bah Bindo M. Lanong, uba long ruh uwei na ki nongseng ïa kane ka seng riewlum, u la shim ïa ka rai ban kyrshan noh ïa ka EC jong u Bah Pynïaid Sing Syiem kaba ïalam mynta hapoh Khasi Hills Autonomous District Council (KHADC). Ka daw kaba la pynlong ïa utei u MDC shu sieh ban shim ïa katei ka rai ka dei namar ka jingkynnoh bym kheiñ briew shuh jong ka seng ïa u watla u long uwei na ki nongseng uba ïadon bynta ban pynkha ïa ka UDP. Kane ka jingïakynad hapdeng u Bah Bindo bad kiwei pat ki nongïalam ka UDP ka la sdang naduh shwa ka ilekshon MLA mynta u snem ha kaba u la shah pynduh tiket ban ïakhun na ka seng kaba u la ïadon bynta ban thaw bad u la hap ban ïakhun kum u kyrtong khlem seng na Nongkrem konstitwensi.
Une u rangbah uba la long teng u Lamphang bad Symbud Myntri Rangbah ka jylla u la pynkynmaw ba u la phah shithi sha ki nongïalam ka seng ha u bnai Lber-Ïaïong, 2023, ban ïa klet noh ïa kaei kaba la dep bad ban sdang thymmai khlem ka jingbuhnud namarba u don jingmut ban ïakhun ïa ka ilekshon MP. Hynrei ym shym la don ba jubab satia ïa u. Ha kajuh ka por, u la pynpaw ïa ka jinglyngngoh ba ha ka General Council ba dang shu dep katto katne por mynta, ka seng kam shym la khot satia ïa u ban ïadon bynta lang ha katei ka jingïalang. Kine ki jingleh jong ki nongïalam ïa u ‘riew rangbah uba la don hakhmat ha ka por ba la pynwandur ïa ka UDP ha u snem 1997 ki long kiba pynlyngngoh ïa kiba bun ba lang. Kumno yn shu kyntait? Balei ban hap ban leh kiar na uwei na ki nongseng ïa ka UDP nalor ba ngim da don shuh ki ‘riew rangbah ha ka saiñ hima sima?
Nalorkata, kane ka jingleh jong ka UDP ïa u Bah Bindo ka pynkynmaw ïa kajuh ka rukom leh ka BJP ïa la ki jong ki nongïalam ba la rangbah kum ïa u Lal Krishna Advani bad u Dr Murli Manohar Joshi nalor kiwei pat. Ka BJP ka la thaw da kata ka ‘Margdarshak Mandal’ bad ka la phah ïa kine ki nongïalam sha kane ka shnat. Hynrei khlem shuh kiba suitñiew ïa ki bad ki la shu sah sa tang ha ka kyrteng. Ka dei ka jingshisha ba kine bad kiwei pat, ki la sdang noh ha ka rta jong ki, hynrei ki la don bun kiba kynthoh pyrshah ïa ka jingleh jong ka BJP hadien ba u Narendra Modi bad u Amit Shah ki la shimti ban pynïaid ïa ka seng nadong-shadong. Ki nongïalam ka BJP kum u Advani bad u Dr Joshi ki la theh syep theh syar ban pynheh pynsan ïa kane ka seng naduh ki snem 1980 ter-ter hadien ba jah noh ka Jan Sangh. Ki la don bynta ban pynsuh thied ïa ka BJP ha kylleng ki bynta khamtam ha North India.
Haduh mynta, u Bah Bindo um pat pyndkut satia ïa ka jingïadei bad ka UDP, bad u dang neh hi kum u dkhot ka seng. U Bah Bindo u dei uwei na ki ‘riew saiñpyrthei u bym pat ju kylla ne kyntiap seng namar u la ïai don beit bad ki seng ‘riewlum naduh 1972 haduh kine ki sngi. Kham ñiar ban ïohi ïa kiba kum kine ki nongïalam ban neh beit ha la ka jong ka nongrim khlem da shah pynthame ha ki jingthaba jong kiwei pat ki seng kiba kham heh paid bad kiba kham bun ka spah ka phew. Ka District Council ruh ka kham i shngaiñ haba dang don kiba kum kine ki rangbah ban ïa synran bad ai jingmut lem ïa kiba dang samla bad ki bym pat da sngewthuh bha ïa ka nongrim ba la seng ïa ki District Council bad kaei ka kamram jong ki ha ka synshar ka khadar bad ka bishar bad khamtam ha ka jingwanrah ïa ki aiñ ki ban ïada ïa ka jaitbynriew rit paid.
Na ki jingkynthoh ha ki rynsan ‘Social Media’, ngi ïohi ba ki don bun ki ‘riew shitkhlieh ki bym tip ïa ka sdang ka kut, hynrei kiba la kren beiñ ïa u Bah Bindo. Ngi kyntu ïa ki paidbah ba kin long kiba kham tyngkan ha ka rukom kynthoh namar ngi kum ka jaitbynriew ngi burom ïa kiba la rangbah la ki dei mano-mano ruh. Ri kyndong la ka akor ka burom bad wat thad ïalade lyngba ki ktien tohmet bad khlem akor ka bym ïahap shuh bad ka dustur jong ngi kum ka jaitbynriew kaba kam ïalade ba ka dei kata kaba ‘tip briew, tip blei’. Da pyni ruh da ki kam ba kata ka jaitbynriew ka long ha kata ka dur lym kumta ka shu dei tang ka jingkren ha lyer bad ka bym don jingshisha. Kam mut ba tang shu la kham san ha ka rta, u ne ka briew kim don shuh ka dor ne ka bor. Baroh ngi don la ka jong ka dor bad ka dor ha kane ka sla pyrthei la ka dei ha kano-kano ka bynta jong ka jingim. Ngi don la ka jong ka bor ban ïa noh synñiang ha ki liang bapher-bapher.
