Washington, Nohprah:
Kum shi bynta ban khanglad ia ka jingwan rung tuh ki poiwir na ki bynta khappud, ki bor ba dei peit jong ka US ki la shim ia ka lad ban khang noh ia ki katto katne ki jaka rieh lieng, ki jingkieng kiba don ha ki bynta khappud bad ka Mexico ban teh lakam ia ka jingthmu rung tuh ki poiwir sha u pud u sam jong ka.
Ka US Customs and Border Protection (CBP) ka la khang noh ia ki lynti rel kiba don ha ki bynta jong ka Texas bad kumjuh ruh ia ki jingkieng iaid kali kiba poi sha US bad ong ba ka donkam bha ia ka US ban teh lakam ia ka jingwan rung ki poiwir ha kaba kum kane ka por kaba mynta naba ki poiwir ki la sdang jyllei bha ha kane ka ri.
Ka jingthmu jong ki poiwir ban rung tuh sha ki bynta jong ka US ha kane ka taiew Christmas ka la pulom naba ka US ka la pyrkhing bha ia ki bynta khappud jong ka bad pynjur ruh ka jingap pahara.
Hadien ka jingkhangnoh ka US ia ki bynta khappud bad ka Mexico la ong ba bun ki poiwir kim shim la iohlad shuh ban wan rung tuh sha US bad ha ka sngi nyngkong u Gov jong ka Texas u Greg Abbott ula ai hukum ia ka tnat pulit ba ka dei ban shim khia ban peit pyrman ia ka jingwan rung tuh jong ki poiwir bad ba ka dei ban kem ia kito kiba la rung jubor.
Katkum ka kaiphod ba la pynmih da ka CBP la ong ba haduh 3,000 ki poiwir ki la shah bat noh ha ka sngi nyngkong ha ki bor ba dei peit hadien ba ki la thmu ban rung na Eagle Pass bad kine ki dei kiba wan na Venezuela, Honduras bad Nicaragua.
Shuh shuh ka khubor ka iathuh ruh ba haduh 10,000 ki poiwir la kem naduh ba sdang u bnai Nohprah ha ki bynta khappud ka US-Mexico. Ka US ka la sakhi ia ka jingjur ka jingwan rung tuh jong ki poiwir naduh kine ki khyndiat snem ba la leit bad ka US Census Bureau ka pyni ba ka don ka jingma kaba ap ia ka US lada ka ailad ia ki poiwir ba kin iai bteng ban wan rung beit sha kane ka ri khlem da don da kino kino ki kyndon bad aiñ ba pyrkhing.
