Nongstoiñ, Nohprah 20
Ka kynhun ïalehkai jong ka Meghalaya Police F.T (MLP) ka la khur ïa ka jingjop ha ka lympung ïalehkai Invitation Knockout Football Tournament 2023-24 ba la pynlong da ka New Nongstoiñ Sports Social & Cultural Club.
Kane ka nam jop ka la wan urlong hadien ba la lah ban pynliem noh ïa ka kynhun ïalehkai kaba na Kolkata, ka United Sport Club da 2-1 kol ha ka sngi Balang ha madan New Nongstoiñ.
Haba phai sha katei ka jingïakhun hapdeng kitei ki ar tylli ki kynhun, ka la long shisha ka jingïalehkai kaba itynnad ha kaba kim shym la lah ban thep kol haduh kaba kut jong ka kylla step.
Dei ha ka kylla miet ba ka United SC ka la ïoh ban pynkhih jar nyngkong ha ka minit kaba 63 lyngba u Prasanta Das, hynrei hashwa ban kut ka jingïalehkai ka MLP ka la ïoh ban pynphai kylla ha ka minit kaba 86 lyngba u Pynshai Lyngkhoi.
Ka MLP ka la thep biang sa shi kol ha ka minit kaba 90+4 lyngba u Bansiewdor Wahlang na ka bynta ban khur syndon ïa ka jingjop. Ïa ka nam ‘man of the match’ la ïoh ban khur da u Bishar Kharumnuid na ka MLP.
