Shillong, Nohprah 20
Ka Mawtawar SC ka la long ba la khreh ban ïaknieh ïa ka nam lahduh pyrshah ïa ka Pohkseh SC ha ka lympung ïalehkai Second Division Football League ban pynïaid da ka Shillong Sports Association ha ka jingïakhun final ka ban long ha ka sngi Palei ha SSA Stadium, Polo.
Na ka liang u MLA barim ka Mawlai Constituency u Bah Process T. Sawkmie ha ka Sngi Balang u la ai ka jingkitbok ïa katei ka kynhun kaba na Mawlai ba kan ïalehkai bha khnang ba kan lah ban kynjoh sha ka thong jong ka jingjop. Kane ka jingïakhun final kan long ha ka por 1:30 baje nohphai sngi.
“Nga kitbok ïa baroh ki rangïalehkai ba kin lehkai bha bad ban ïoh rah ïa ka nam lahduh ha kane ka sngi pyrshah ïa ka Pohkseh SC,” la ong u Bah Sawkmie haba kren ha ka jingïalang balyngkot kaba ki la pynlong ha ïing shnong jong ka Mawtawar.
U la pynpaw ruh ïa ka jingkmen kaba shikatdei eh halor ka jingïoh kiew kyrdan sha ka 1st Division ka Mawtawar SC ka ban ïalehkai ha ka samoi ka ban wan.
U la banjur ruh ïa ki nongïalehkai ba kin ym kut tang ha Polo, hynrei ban trei shitom ban ïoh ïalehkai ha ka National bad International ruh kumjuh.
“Phi ïa donkam ban trei shitom, aiti lut (sacrifice) bad ban long donakor ne discipline ha ka jingim jong phi haba ïa dei bad ka jingïalehkai phutbol” bynrap u bah Sawkmie.
Katba na ka liang u President ka Mawtawar SC u samla Peter Mukhim, Secretary Bah Baiaineh Kharumlong, Rangbah Shnong, Bah Cornelius Kharkongor, secretary shnong Bah K.S Nongdhar bad Bah W. Mukhim ki la pynpaw ïa ka jingsngewnguh ïa bah P.T Sawkmie u bym ju ïehnoh ïa ka Mawtawar SC bad uba ïai don ryngkat bad ki barabor.
Ha kane ka sngi u Bah Sawkmie u la noh synñiang ruh da ka song pisa sha ka klob shi bynta jong ka jingai mynsiem ïa ki.
