New Delhi, Nohprah:
Ka Myntri Rangbah jong ka West Bengal ka Mamata Banerjee, ïa kaba la rai ha ka sngi Ba-ar ba ka seng synrop INDIA kan sa ai ïa ka rai ha kaba ïadei bad ka jingjied kyrtong ban ïakhun ïa ka shuki Myntri Rangbahduh hadien ka ilekshon Lok Sabha, ka la pynpaw ba ka la kylla syndet-syndet da kaba tyrwa da ka kyrteng jong u heh nongïalam ka seng Congress u Mallikarjun Kharge na ka bynta kane ka shuki.
Kumba la ïathuh ka tyllong khubor, la ong ba ka jingtyrwa jong ka Banerjee da ka kyrteng jong u Kharge ka la long ha ka por ba ka jingïalang jong ka kynhun ka liang pyrshah ka dang ïaid shakhmat. Ka jingtyrwa jong ka da ka kyrteng jong u Kharge ka la pynlong ïa kiba bun ba kin mynjur naba u la long u riewpawkhmat jong ka kynhun ki Dalit ha ka kynhun ka liang pyrshah.
Kumba la sakhi, la ong ba 12 tylli na kine ki seng kiba la ïashim bynta ha ka jingïalang ki la pdiang ïa ka jingtyrwa, la ïathuh ka tyllong khubor. Wat u Myntri Rangbah jong ka Delhi u Arvind Kejriwal, ïa uba la paw hashwa ba u la kham kiar ha ka jingïadei bad ka seng Congress, u la ai ïa ka jingkyrshan halor kane.
“Kane ka dei ka jingkylla ban don ïa u Myntri Rangbahduh uba nongkong eh na ka kynhun jong ki Dalit,” la ïathuh ka tyllong khubor kumba la kren da u Kejriwal.
Na ka liang jong u Kharge, u la kyntait halor kane, u la ong ba na ka liang jong u u la kwah ban trei tang na ka bynta ki duk ki rangli.
“Ngi la dei ban jop nyngkong eh ha kaba ïadei bad ka jingpyrkhat kumno ban ïoh ïa ka jingjop. Kan don jingmut aïu ban ïakren shaphang ka shuki Myntri Rangbahduh hashwa ba ngin ïoh ïa ki MP? Ngi la dei ban pyrshang ha ka ban pynbun paid da ka jingïatreilang,” la ong u Kharge ha ka jingïakren bad ki nongthoh khubor.
