Shillong, Nohprah 20
Ka samla Whitney Maqueen Lyngdoh Mawphlang ka la wanrah nam bad burom ïa ka Jylla ha ka jingïakob pyni dohksah jong ka Mr & Miss India kaba la pynïaid da ka World Fitness Federation Rajasthan kaba la long ha nongbah Jaipur naduh ka 15 haduh 17 tarik mynta u bnai.
Kane ka samla ka la khur haduh 2 tylli ki takma kiba kynthup ïa kawei ka takma ksiar ha ka kyrdan jong ka Women’s Sports Model bad kawei pat ka takma rupa ha ka kyrdan jong ka Bikini (Women’s).
Ka samla Whitney ka dei ka khun jong i Kong Bluevell Lyngdoh Mawphlang bad i Bah Fullmoon Nongrum. Ka la shah jied ban mihkhmat ïa ka Jylla dei hadien ba ka la ïohrah ïa ka takma ksiar ha ka jingïakob jong ka Mr & Miss Meghalaya 2023 ha ka kyrdan Women’s Fitness kaba la long ha ka 4 tarik Risaw mynta u snem.
Kane ka samla ka la ïathuh ba ka la sdang ïa ka kam ïalehkai kilan met naduh u snem 2022 bad lyngba ka jinghikai jong uwei na ki ‘rang heh ksah ba paw ka Jylla ba la tip kyrteng kum u Bah Donbor Rumnong i la lah ban pynjanai ïa ka kam kilanmet ha ryngkat ka jingtrei shitom ban poi sha ka thong.
Shuh shuh ka samla Whitney ka la ïathuh ruh ba dei lyngba ka jingai mynsiem jong kiba ha ïing ha sem lem bad u nonghikai ka sa sdang ban ïashim bynta ha ki jingïakop pyni dohksah bapher bapher la ki long hapoh ka jylla ne shabar jong ka jylla ruh.
Khyndiat shaphang ki jingïakop kiba kane ka samla ka la sdang ban ïashim bynta ki kynthup ïa ka Miss Meghalaya ha u snem 2022 ha kaba ka la wan ha ka kyrdan kaba ar pynbud sa ka jingïakop jong ka East India kaba pynlong ha Sikkim ha u bnai Naiwieng jong u snem 2022 bad hangne ruh ka samla Whitney ka la ïoh ïa ka takma rupa hadien kata sa ka Mr. Ironman Amateur kaba pynlong ha Jowai ha u Nailur bad hangne ka la ïoh ïa ka takma ksiar pynbud pat sa ka Miss Meghalaya kaba la pynlong ha ka 4 tarik Risaw ha kaba ka samla Whitney ka la ïoh rah syndon ïa ka nam lahduh ha ka kyrdan jong ka Women’s Fitness bad kaba la pynlong ïa ka Meghalaya Body Building Association ban phah syndon ïa ka ban mihkhmat ïa ka Jylla sha ka jingïakop kaba heh ia kaba la tip kum ka Mr & Miss India ha Rajasthan.
Wat hapdeng kiei kiei baroh na ka liang ka samla Whitney Lyngdoh Mawphlang ka la ïathuh ba ka la mad ïa shibun ki jingeh khamtam ha kaba ïadei bad ki lad jingïarap namar ka jingduna ki kiba ai jingïarap bad ki don tang katto katne ngut kiba la wan shakhmat ban iarap bad ai mynsiem ïa ka kum ka samla kiba kynthup ïa u MLA ka North Shillong Constituency u Bah Adelbert Nongrum bad u MLA ka Mawkynrew Constituency Bah Banteidor Lyngdoh nangta ki riew shimet ki paralok parajor bad kiba ha ïing ha sem.
Shuh shuh ka samla Whitney ka la pynpaw ruh ka jingsngewnguh ïa u trai jong ka gym “GEN FIT GYM” kaba don ha Mawlai Nongkwar uba la ailad ïa ka ban pynjanai ïalade ha kaban kilan met na ka bynta ka jingpynkhreh ïa ki jingïakop bapher bapher bad ruh ïa u nonghikai uba la pynbit pynbiang bad peit bniah naduh ka rukom bam ki jinglehkai bad kiwei kiwei ki jingdonkam katba dang pynkhreh ïa ki jingïakop bad ka la ong ruh khlem da klet ka jingsngewnguh bad ka jingkhu-blei ka leit sha kiba ha ïing ha sem kiba la ai mynsiem bad pynpaw ïa ka jingshaniah ha ka kum ka riew kynthei.
