Ha kine ki sngi ba lajan ka sngi rakhe ïa ka Khristmas, ngi ïohi tang ïa ki jingpynthaba suda khamtam ha Khyndailad kaba dei ka jaka pdeng jong ka ïadie ïathied ïa ki riam ki beit. Ka jingpynthaba bad ka jingpynbiang ïa ki riam ki beit ha ka por Khristmas ka la dei ka dustur bad i kumba la don ba thoh syndon da ka aiñ ba lada ym pynthaba bad lada ym riam da ki jaiñ bathymmai, yn ym don satia kata ka Khristmas. Kine baroh ki dei tang ki jingleh jong u briew bad ym kaba wan nangno-nangno. Ka long shisha kaba iphuh-iphieng ban peit ïa ka jingthaba khlek-khlek. Ki surok ki long kiba i shngaiñ bad ym kumba long 11 bnai shiteng ha ka shi snem ba shah tyllep ha ka jingdum bad kaba buh jingma ïa ka ïaid ka ïeng. Ngi tip shai ba kine ki jingpynthaba ki dei tang ki rongphong shi sngi bad ki bym ai jingmyntoi ïano-ïano lait noh tang ïa kito kiba ïoh kontrak ban pyndait ïa ki jingpynthaba, hynrei watla katta ruh, ngi ïohi ba ki nongshong shnong ki sngewtynnad bad ki kmen. Ah, ki nongshong shnong bapli, shu pynthaba tang khyndiat ruh ki la ïa shongshit!
Ka jingshongshit ka dei na ka jingring ïa ki dur khih bad ka jingshon ïa ki dur ban pyni sha kiwei pat ba ka Shillong ka la pynkhreh na ka bynta ka Khristmas. Kane ka long ba i kumba khlem don Khristmas ha ki snem kiba la leit noh namar ka jingbym don ki jingpynthaba! Wow, ka jingïabeh ïa ka rongphong pyrthei kaba la i shyrkhei hi khait. Kan jin da la long da kumwei lada kan don ka jingthaba ha ka jingim jong ki nongshong shnong khamtam ki duk ki suk. Ka aïom Khristmas ka dei ruh ka aïom jong ka jingïasam markylliang ïa ki jingsngewbha. Ngi tip ba ki don katto katne kiba leh bha ïa kiwei ha man ba don kiba kum kine ki jingrakhe bad khamtam ha ka por Khristmas. Ki klet noh shwa ïalade bad ki mareh ban pynbiang ïa kiwei khnang ba ma ki ruh kin sngew ba ki don bynta ha kata ka aïom jong ka jinglehkmen bad ka aïom jong ka jingkyrmen.
Kum ki briew ngim dei ban klet ba kane ka aïom ka dei ruh ka por ka ïa jong ka jingwanrah jingkylla ha la ka jong ka jingim. Ka jingkylla ka sdang shwa nalade bad hadien kata kan sa pur sa sha kiwei. Lada ngim lah ban pynkylla shwa ïalade, ngim dei ban khmih lynti ba kiwei kin kylla na ka bynta ka jingbha lane na ka jingbha sha kaba kham bha lane na ka jingsniew sha kaba bha. Ka jingleh klet ïa ki para briew, khamtam ïa ki baduk bakyrduh, ka la pynijli ïa kane ka pyrthei ïing shong basa. Ka malade ka synshar ha baroh. Tang ba la biang ïalade, ka la biang lut nadong shadong wat lada ngi tip shai ba kiba bun kim don hapdeng ka bit ka biang bad ki hap ban ïa ksaid wat tang ban ïoh bam ja shisien ha ka shi sngi. Ngim pat ïakren ïa kita ki jingpynthaba ha ki lynti syngkien ne ka jingthied ïa ki riam ki beit na Khyndailad lane na ki rynsan ‘Online’ kiba laiphew jait laiphew skit.
Ha kane ka aïom jong ka jinglehkmen leh sngewbha, to ngin long ka jingkyrkhu na ka bynta kiwei ha ki liang bapher-bapher la ka dei lyngba ki kam bakhraw ne ki kam barit, hynrei kiba wanrah pat ïa ka jingkmen halade bad ha kiwei. Lada ngi lah ban leh bha leh miat ïa kiwei, kata ruh ka wanrah ïa ka jingkmen kaba kham bun shah ban ïa kaba ïoh ïa ki jaiñ ki nep bad ki juti bathymmai. Kam don kano-kano ka Balang Khristan kaba hukum ïa ki ‘riewngeit jong ka ba ki dei ban wan sha ïingmane da kaba phong da ki jaiñ ba dang shu dep thied shen. Kam don kano-kano ka Balang kaba khang ïa ki bym phong da ki jaiñ ki nep ki bathymmai ban rung sha ïingmane. Kane baroh ka dei tang ka rongphong kaba la pynlong aiñ kaba khlem da thoh da u khun bynriew hi khnang ba un lah ban kamai jakpoh. Ha ka jingïabeh thong ïa ka rongphong pyrthei, ngi klet noh ïa ka nongrim jong kane ka aïom jong ka jingkyrmen bad ka jingkmen. Ka long shisha kaba sngewsih.
Ha kajuh ka por, ngi kyntu ïa ki para nongshong shnong ba kin don ka mynsiem jong ka jingsam lem ïa ka jingkmen sha kiwei khamtam hapdeng ki khyllung khynnah ki baduk ba rangli. Lada ngi lah ban leh bha ïa kiba kum kita, ngin ïoh pdiang ïa ki jingkyrkhu kiba kham bun shah bad kiba kham palat ban ïa ki jingpynthaba rongphong pyrthei ha Khyndailad bad ha kiwei pat ki jaka jong ka sor Shillong bad ka jylla. Ha kane ka aïom, ngi dei ban don ka mynsiem ban ïarap lem ïa ki para briew kiba don jingjynjar. Ym donkam pat ban ïa put turoi ïa kita ki jingleh bha, bad ai kan sah hapdeng ki nongai bad ki nongïoh bynta. Sa shisien pat ngi kyntu ïa ki nongshong shnong ban ym shah pynthame ha ki jingthaba bad ban pynleit jingmut kumno ban long ka jingkyrmen na ka bynta kiwei.
