Seoul, Nohprah:
U Nongialam ka North Korea, u Kim Jong Un ha ka Sngi Palei u la maham pyrshah ia kino- kino ki ri kiba thmu ban pynthut ia ki kam-ki jam jong ka North Korea, ka North Korea ruh kan nym aili hynrei kan pynhiar kput bad ai jingsneng da u ‘namding Nuclear uba khlaiñ ba ka North Korea ka la dep shna kyrpang.
Katei ka jingbyrngem jong u Kim ka long ruh hadien ka jingiakren hapdeng jong ka South Korea bad ka United States kaba dang shu dep shen ha kane ka taiew ba la lah hapoh ka nongbah Washington jong ka United States, ha kaba ki nongialam jong kitei ki arliang ri ki la ioh ban iakren halor ki kam Nuclear kiba lah ban ktah ia ka thaiñ North baroh kawei lada ym lah ban iabeit bad ia kohnguh lem ia ki aiñ bad ki kyndon ba la buh naka bynta ka jingshngaiñ jong ki paidbah.
Katei ka jingialang ba la pynlong ha United States ha ka taiew ba la lah, ka long ban iakren- ia pynbeit halor ki mat ba iadei bad ki kam Nuclear bad kumjuh ruh ki jingthmu ban pyniaid ia ki kam- ki jam hadien- habud da ka jingiatrei lang jong kitei ki arliang ri bad ka ban long ka jingmyntoi ruh ia ka pyrthei bad ia kiwei de ki ri hynrei ka ban ym buh jingma ia ki ri jong ka pyrthei.
Hynrei u Kim u la iathuh ba ka tnat iada jong ka North Korea kan nym ailad pat ia kino- kino kiba pyni bor ne pynthut ia ka North Korea bad ka kloi ruh ban pynphai kylliang da ki ‘namding Nuclear kiba khlaiñ bor jong ka.
